Ilustrasaun labele fuma

DILI,18 janeiru 2022 (TATOLI)—Responsavél Sentru Hapara Fuma, Médiku Jerál Eldino de Castro Rangel, informa, hahú iha fulan jullu 2021 to’o janeiru 2022, fumadór na’in-170 mak konsege hapara fuma tabaku, hafoin liuhosi prosesu akonsellamentu no tratamentu médiku.

“Fulan jullu 2021, ami hahú uluk fó akonsellamentu ba pasiente sira ne’ebé mak hakarak hapara fuma liuhosi atendimentu aimoruk ba sira, ne’ebé totál pasiente ne’ebé mak  iha fulan jullu too agora  hamutuk 210, hosi númeru ne’e  husi ne’e fumadór na’in-170 konsege para fuma tabaku,” Responsavél  ne’e hateten ba Agência TATOLI iha knaar fatin, Bairru Formaza-Dili, tersa ne’e.

Notísia relevante: Fumadór 140-resin hahú konsulta atu hapara fuma tabaku

Hosi totál fumadór 210 ne’e, kompostu feto na’in-lima no mane na’in 205, maibé sentru ho susesu fumadór na’in-170 mak para ona fuma signifika sira la fuma ona.

Enkuantu pasiente ka fumadór na’in-43 mak iha hela prosesu akonsellamentu signifika  sira seidauk prontu atu hapara fuma, nune’e sira sei mai nafatin halo konsulta.

“Pasiente barak mak mai sira hakarak para fuma ho razaun dahuluk sira preokupa liu ba sira-nia saúde   no daruak mak impaktu ba sira-nia ekonomia uma laran, nune’e sira deside hodi mai konsulta atu hapara fuma,” nia informa.

Sentru ne’e mós rejista fumadór sira ne’ebé mai konsulta atu hapara fuma sigarru ne’e, maioria ho idade joven no mós idade avansadu sira.

Tuir matadalan ne’ebé iha katak pasiente ka fumadór ne’ebé mak depedensia ba nikotina ki’ik sei tuir sesaun dahuluk no simu mak akonsellamentu no daruak deside sira-nia problema iha ne’ebé no sira para duni fuma ka lae. Médiku sira identifika ida ne’e mak hafoin fó tratamentu ba sira.

“Ita-nia medikamentu ba fumandór mak aimoruk nicotine replacement therapy (NRT) ne’e hanesan nikotina ida ne’ebé mak troka sigarru nia fatin,” nia esplika.

Nune’e, estoke aimoruk ba fumadór sira sei sufisiente hela, tanba aimoruk iha tipu haat, ne’ebé   ho tipu rua hanesan aimoruk nicotine Gum mak 2mg no 4mg ne’ebé mak nata de’it no ida seluk mak patch 4mg no 21mg mak taka de’it iha isin.

Notísia relevante: MS lansa sentru hapara fuma prevene moras la hada’et

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here