DILI, 18 janeiru 2021 (TATOLI)—Deputadu Bankada Kmanek Haburas Unidade Nasionál Timor-Oan (KHUNTO), António Verdial de Sousa, husu ba Ministériu Agrikultura no Peska (MAP) atu harii laboratóriu nasionál hodi halo teste ba ai-han importadu.
“Ita-nia rai seidauk iha laboratóriu hodi halo teste ba ai-han ne’ebé ita importa. Asuntu ne’e perigu tebes tamba sei fó implikasaun ba populasaun nia saúde. Orsamentu Jerál Estadu (OJE) tinan 2022 aloka ba Ministériu Agrikultura no Peska (MAP) $21.400.322, tanba ne’e presiza harii laboratóriu nasionál hodi halo teste ba amostra produtu ai-han no bebida hotu ne’ebé tama hosi rai-li’ur,” Deputadu Bankada Governu ne’e hateten liuhosi ninia intervensaun iha sala plenária Parlamentu Nasionál, tersa ne’e.
Notísia relevante: Tinan ne’e, IQTL-UNIDO inisia planu estabelese laboratóriu nasionál kualidade produtu
Nia dehan, durante ne’e komunidade konsumu ai-han importasaun barak, prodús hosi fábrika ne’ebé kontamina ho kímiku no konserva iha frigurífiku, ne’ebé ai-han hirak ne’e sei fó implikasaun ba ema-nia saúde.
“Goverrnu tenki ho seriedade tau-matan ba problema hirak hanesan ne’e, tanba ita hotu akompaña hela durante ne’e timor-oan barak mak mate ho tinan produtivu tebes,” nia argumenta.
Aleinde ne’e, Deputadu ne’e sujere ba Governu halo akordu ho entidade ne’ebé importa produtu ai-han, nune’e molok importa tenke iha lista ai-han inklui nia amosta.
“Ami haree timor-oan barak mak daudaun ne’e hetan moras oin-oin hanesan kolestrol, tensaun, kankru, no moras króniku seluk. Buat hirak ne’e mai hosi hahán importasaun,” nia tenik.
Nia haktuir, iha tinan 2012, Governu no parseiru kolabora hodi hamosu Konsellu Nasionál Seguransa Ai-han no Nutrisaun Timor-Leste (KONSANTIL), ne’ebé asuntu barak mak tau hamutuk hodi hatúr iha planu.
“Governu la halo tuir planu ne’ebé hakerek ona iha dokumentu nia laran, signifika laiha sustentabilidade serbisu. Iha ne’e hatudu mai ita katak bainhira troka Governu, sasán hotu troka tuir ida-idak nia hakarak. Ikus liu maka laiha meta permanentee ne’ebé Governu bele alkansa, nune’e bele rai hela produtividade ne’ebé bele sai referénsia ba governasaun tuir mai,” Deputadu subliña.
Jornalista : Vitorino Lopes da Costa
Editora : Julia Chatarina