Diretór CNE RAEOA, Tomás Oqui Meta. Imajen espesiál.

DILI, 18 janeiru 2022 (TATOLI) – Komisaun Eleisaun Nasionál (CNE, sigla portugés), Rejiaun Administrativa Espesiál Oé-Cusse Ambeno (RAEOA), prepara ona ofisiál monitorizasaun hamutuk na’in-86 hodi halo supervizaun iha eleisaun prezidensiál.

“Ohin, ita públika ona rezultadu hamutuk ema na’in-86 iha eskritóriu CNE Oé-Cusse, atu halo supervizaun ba estasaun votasaun 80, ita rekruta de’it ema na’in-86 tanba antes ne’e rekruta ona ema na’in-rua, ne’ebé hamutuk na’in-88 mak ita prepara sira iha eleisaun ne’e,” Diretór CNE RAEOA, Tomás Oqui Meta, informa ba Agência Tatoli liuhosi telefónika, tersa ne’e.

Nia informa, ofisiál supervizaun hirak-ne’e sei hala’o servisu iha CNE rejiaun hahú iha fevereiru no remata iha fulan-abríl tinan ne’e, tanba kontratu ba fulan tolu.

Nune’e mós rekrutamentu ne’e liuhosi konkursu públiku submete dokumentu ba selesaun dokumentu, depois tama ba teste orál no faze finál ba aprovadu mak teste eskrita.

Tanba eleisaun realiza kada períodu tinan lima, entaun komunidade presiza informasaun, nune’e sira bele ezerse sira-nia direitu nu’udar sidadaun Timorense iha loron eleisaun.

Nune’e tuir dadus hosi Sekretariadu Tékniku Administrasaun Eleitorál iha Rejiaun Oé-Cusse, daudaun ne’e prepara ona brigadista hamutuk 88 hodi destaka sira iha sentru votasaun hamutuk 60 no estasaun votasaun hamutuk 88 iha teritóriu Oé-Cusse.

Entretantu, totál eleitorál provizóriu iha Rejiaun Administrativa Espesiál Oé-Cusse Ambeno, daudaun ne’e STAE rejista hamutuk 50.293, komposta hosi mane 25.655 no feto 24.638.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here