IJE mellora estrada foun iha Oésilo. Imajen mídia ZEEMS.

DILI, 17 janeiru 2022 (TATOLI) – Projetu melloramentu estrada foun ho kilómetru 7,200 hosi bairru Bitopa, aldeia Buqui, suku Usitasa’e, liga ba bairu Paut, aldeia Oebaha, suku Bobometo, perténsia iha sub-rejiaun Oésilo, daudaun ne’e progresu fíziku atinje ona 25%.

“Agora nia progresu ba serbisu fíziku foin 25%, sei iha kontinuasaun depois udan-been menus, tanba daudaun ne’e ekipamentu sira presiza hela manutensaun inklui karreta sira-ne’ebé ami uza iha projetu ne’e,” Xefe Departamentu ba Intitutu Jestaun Ekipamentu (IJE) iha RAEOA, Tomás Pinto Amaral, informa ba Agência Tatoli, liuhosi telefónika, segunda ne’e.

Nia fó-sai katak, melloramentu estrada foun ne’e, tuir kontratu durasaun sei termina iha fulan-maiu tinan ne’e, no sei kompleta kedas ho ponte boot unidade rua, tanba bazea ba planta no kadernu enkargu sei konstrui ponte ida iha mota Bitopa, aldeia Buqui, ida sei kontrui iha mota aldeia Oébaha.

Purtantu, projetu melloramentu estrada foun ne’e, hahú hatuur fatuk dahuluk iha loron 04 dezembru 2021, hosi Prezidente Autoridade RAEOA, Arsénio Paixão Bano, ho objetivu atu fasilita komunidade sira hosi sub-rejiaun Pássabe, Nítibe no Oésilo inklui transporte públiku no privada sira hodi transporta produtu lokál ba merkadu tradisionál sira ba sub-rejiaun Pante Makasar nu’udar Oé-Cusse vila.

Tanba ne’e, durante tinan barak, liuliu iha tempu udan difikulta movimentu komunidade transporte no estudante sira, maka tinan ne’e autoridade RAEOA hahú loke estrada foun ne’e.

Xefe suku Uistasa’e, Tomás Ulan Kolo, agradese ba autoridade RAEOA, tanba estrada foun ne’e sei apoia komunidade sira, atu hala’o atividade tantu tempu udan no bailoron.

“Estrada ne’e uluk kedas, nia dalan alternativa mak hakat tuir mota de’it, entaun iha tinan hirak liuba ami hatama proposta no rezultadu mak agora halo ona, ne’ebé ba ami hamutuk ho komunidade apoiu hodi kontribui oferese rai pedasuk hodi halo, tanba ne’e importante ba komunidade hotu mai hosi sub-rejiaun tolu ne’e,” lidér lokál ne’e orgullu.

Entretantu, projetu ne’e ezekuta hosi Institutu Jestaun Ekipamentu (IJE), ne’ebé tutela direita iha Diresaun Rejionál Infraestrutura, ho valór gastu hamutuk rihun $42, ne’ebé aloka hosi Orsamentu Jerál Estadu (OJE) ho durasaun servisu durante fulan-haat.

Notisia relevante: MOP RAEOA aloka rihun $42 mellora estrada foun iha Oésilo

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here