Médiku iha iha Palásiu Prezidensiál prepara vasina Booster Pfizer iha seringa hodi fasilta Prezidente Repúblika, Francisco Guterres ‘Lú-Olo’ simu vasina doze datoluk. Imajen/Mídia PR.

DILI, 17 janeiru 2022 (TATOLI)—Prezidente Repúblika, Francisco Guterres ‘Lú-Olo’, segunda ne’e, simu ona vasina Booster Pfizer hodi aumenta imunidade luta kontra COVID-19 liu-liu variante foun Omicron, tuir Organizasaun Mundiál Saúde nia orientasaun.

Notísia Relevante: COVID-19: kazu detetadu pozitivu ida no ativu na’in-24

“Ohin, hau mai simu tan vasina doze ba dala tolu hodi kontra COVID-19,” Prezidente Repúblika hateten ba jornalista sira hafoin simu vasina iha Palásiu Prezidensiál Nicolau Lobato, Bairru Pite, Dili.

Dalan di’ak liu mak simi vasina aumenta imunidade hodi luta kontra COVID-19, tanba virus ne’e iha Timor-Leste no mundu seidauk hotu tanba daudaun ne’e mosu tan fali ona COVID-19 varienta foun hanaran Omicron iha nasaun viziñu Indonézia, nune’e rai barak mós simu ona vasina doze datoluk tuir orientasaun mundiál saude (OMS) nian.

“Di’ak liu ita atu bele hotu-hotu aseita vasina ne’e ba dala-ida tán ba dala tolu bele proteje ita-nia an di’ak liu hasoru variasaun oioin, ikus liu bolu Omicron ne’ebé tama to’o iha Indonézia. Naturalmente virus ne’e la’o hakat liu fronteira ba iha rai hotu.  Entaun ita viziñu ho maluk sira ho sorin ninian ho moras variante foun ne’ebé mosu, ha’u husu hotu-hotu bele simu vasina proteje an, família no nasaun ho di’ak liután,” nia hateten.

Maske Governu ho kondisaun mínimu kasoru pandemia COVID-19 maibé Governu konsege hola medida preventiva barak, hanesan liuhosi medida estadu emerjénsia no konfinamentu obrigatóriu.

Tan ne’e, Prezidente Repúblika fiar ba Governu asaun hodi atua kazu COVID-19 no karik  bainhira variante foun Omicron ne’e tama iha rai laran karik bele atua ho di’ak. Maibé dalan di’ak liu mak sidadaun sira atu hakbesik an simu vasina hodi hasai imunidade.

Entertantu, Prezidente Repúblika simu vasina datoluk ne’e fasilita direta hosi médiku sira iha Prezidensia Repúblika no funsionáriu Palásiu Prezidensiál mós simu vasina.

Notísia Relevante: Prezidente Repúblika kompleta ona vasina AstraZeneca

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here