Imajen/Media PR.

DILI, 17 janeiru 2022 (TATOLI)—Reprezentante povu iha Uma fukun Parlamentu Nasionál (PN), segunda ne’e, liuhosi plenária aprova rezolusaun Parlamentu Nasional númeru 84/V(4)- no área temátika iha ambitu debate ho sidadaun sira.

“Rezolusaun ho votu á-favor 44, kontra 0 no abstensaun 0, ho nune’e pasa,” Prezidente Paralamentu Nasionál, Deputadu Aniceto Longuinhos Guterres Lopes, deklara iha plenária Parlamentu Nasionál.

Rezolusaun iha área temátika debate ho sidadaun sira-ne’e mak kona-ba saúde públika no mudansa klimátika.

Deputadu proponente, Antonio Verdial, hateten ka’er ba liafuan demokrásia ne’ebé promove demokrásia partisipativa no reprezentativa mak komisaun G hili tópiku rua hanesan saúde públika no mudansa klimátika.

Programa rezolusaun ida-ne’e, hanesan programa lian povu nian no aprova uza rezolusaun PN númeru 7/tinan 2019, 30 abríl, programa sira-ne’e mak debate sidadaun, orsamentu partisipativu no direitu ba petisaun rasik.

Debate ba sidadaun konforme dezigna iha konstituisaun ba pilár dahuluk atu kria ka partisipasaun, estabelese partisipasaun direta ba feto no mane iha Timor-Leste ho objetivu atu kria liña komunikasaun entre PN no sidadaun sira.

“Saúde públika hanesan tema ida-ne’ebé ohin loron inkorfotavel iha sosiedade nia leet ho tan virus COVID-19, no moras foun ne’ebé mai hodi altera ita hotu nia vida ho forma ida-ne’ebé ita hotu la espera,” Prezidente Komisaun G ne’e hateten.

Deputadu hosi bankada KHUNTO ne’e hateten, PN liuhosi komisaun G halo atividade ida-ne’e ho objetivu fundamentál atu hakbesik ba povu, hodi halo debate hanesan forma publikamente atu promove implementasaun polítika hosi interrese ida hamutuk ho membru lejislativu no membru ezekutivu.

Deputadu Fretelin, Jose Agostino Sequeira ‘Somotxo’, hateten tema iha rezolusaun ne’e importante tebes ne’ebé atu ko’alia hanesan oportunidade rua iha fulan janeiru no juñu nia laran.

Nia parte konkorda ho tema saúde publiku, maibé kona-ba tema mudansa klimátika hakarak tau tema seluk muda ba tema autoridade.

“Ita hotu iha ne’e, hahú hosi PR to’o xefe suku sira laiha autoridade. Tan ida-ne’e, ha’u-nia hakarak ne’e tau asuntu ida ka tema ida-ne’ebé liga ba oinsá mak Estadu ne’e ezerse ninia autoridade,” nia dehan.

Nia fundamenta, uluk kedas defende edukasaun sívika no sidadania atu sidadaun sira bele no tenke hatene dever, obrigasaun no liberdade demokrásia.

“Ha’u hanoin ba plenária destintu deputadu sira hotu atu hili tema ne’e, tanba interresante tebes bele fó sai hanoin ruma ba povu tomak,” nia dehan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here