Atividade iha sala plenária Parlamentu Nasionál. Imajen TATOLI/António Gonçalves.

DILI, 17 janeiru 2022 (TATOLI)—Komisaun G ne’ebé trata asuntu Edukasaun, Juventude, Kultura no Sidadania, segunda ne’e hato’o relatóriu no rekomendausan ba Ministériu Edukasaun, Juventude no Desportu (MEJD) katak maiória eskola iha Manatuto laiha bibliteka.

Notísia Relevante: MEJD prevee millaun $81 ba edukasaun iha tinan 2022

Membru Komisaun G, Deputada Gabriela Alves, aprezenta relatóriu hosi rezultadu fiskalizasaun iha plenária parlamentár hodi bolu atensaun ba MEJD, liu-liu observasaun ba eskola primária, sekundária no tékniku vokasionál iha munisípiu Manatuto ne’ebé laiha moru, falta bee-moos, falta kantina, falta manorin-na’in iha área espesífika formasaun espesiálmente iha ensinu tékniku vokasionál no falta materiál didátiku.

“Ensinu tékniku vokasionál laiha laboratóriu no bibleoteka ba alunu sira atu bele konsulta livru no matéria ba prátika iha aula. Maioria eskola iha munisípiu Manatuto laiha bibleoteka, avaliasaun dezempeñu profesór laiha mudansa relativamente ba aumenta saláriu progresaun iha karreira. Maiória profesór kontratadu la simu saláriu, professor sira iha tékniku vokasionál laiha formasaun ba área selesiona,” Deputada Gabriela Alves relata rezultadu fiskalizasaun, ne’ebé Komisaun G hala’o iha 09-12 jullu 2021 ba iha eskola sira iha munisípiu Manatuto ho Bobonaro.

Tanba ne’e, Komisaun G hato’o rekomendasaun ba MEJD atu promove alterasaun remuneratóriu ho baze formula saláriu báziku no subsídiu, relativa ho profesór kontratatu hosi ministéiru  presiza halo kolaborasaun ho diretór eskola sira hodi halo akonsellamentu kona-ba kontratadu.

MEJD tenke fó importánsia saláriu profesór kontratadu kona-ba pagamentu saláriu, fó  konsiderasaun espasu fíziku eskola ho forma asegura prosesu aprendizajen no aloka fundu ba konstrusaun refretóriu iha eskola.

Tenke orienta inspetór eskolár hodi halo identifikasaun jerál ba profesór kada eskola no mellor mekanizmu funsaun públika ba funsionáru iha avaliasaun dezempeñu ne’ebé sempre “Muito Bom’’, maibé to’o agora saláriu no eskalaun laiha alterasaun, determina rezolve difikuldade profesor iha eskola liu-liu área remota.

Komisaun G rekomenda ba Ministéiru Ensinu Superiór no Siénsia Kultura tau atensaun ba saláriu pontu fokál, regula utilizasaun uniforma eskolár ba eskola hotu iha territóriu, efetua pontualmente transferénsia verba orsamentu ba merenda eskolár, hodi evita eskola kontraria dívida iha kióske hodi garante merenda ba estudante no konstrusaun eskola tékniku vokasionál Mahunu Bukar.

Entretantu, nia relata, fiskalizasaun ne’ebé Komisaun G hala’o iha munisípiu Bobonaro ho konkluzaun katak bazea ba observasaun no informasaun ne’ebé rekolla ne’e identifika ho problema hanesan maiória eskola iha munisípiu Bobonaro no postu administrativu laiha moru, ne’ebé difikulta tebes iha ensinu aprendizajen no eskola sira laiha serguransa.

“Maiória eskola laiha bee-moos. Ida-ne’e difikulta alunu no profesór sira atu kumpre regra sira hodi prevene no kombate moras COVID-19,” nia dehan.

Nune’e mós, falta profesór sira iha área espesífiku iha ensinu tékniku vokasionál, falta materiál didátiku, falta ekipamentu eskolár, laiha laboratóriu no ekipamentu hodi tuir prátika iha aula laran.

Iha ensinu báziku, iha profesór reklamante ne’ebé mak hanorin tinan barak ona maibé to’o agora seidauk hetan rekuñesimentu hosi Ministéiru Edukasaun Juventude no Desportu (MEJD), avaliasaun dezempeñu ba profesór, laiha impaktu ba mudansa saláriu no eskalaun, ho maiória eskola laiha ekipamentu informátika (komputadór), laiha bibleoteka no laboratóriu.

Komisaun G prodús rekomendasaun sira mak hanesan, rekrutamentu ba profesór sira tenke iha uluk kolaborasaun ka servisu hamutuk ho diretór eskola, nune’e sira bele fó hanoin antes halo rekrutamentu.

Rekomenda katak, tenke fó prioridade ba profesór kontratadu sira-ne’ebé mak hanorin tinan barak ona hodi bele sai ona profesór permanente hodi haree fali ba dekretu-lei númeru 7/2010, 19 maiu, kona-ba rejime jurídiku administrasaun no jestaun sistema ensinu báziku.

MEJD tenke aloka orsamentu ba akizisaun ba materiál kuziña nian hodi asegura implementasaun ba programa merenda eskolár.

Hadia mekanizmu tratamentu funsionáriu públiku sira liu-liu ba profesór sira, tanba tinan-tinan sira hetan avaliasaun dezempeñu ne’ebé hetan “muito bom” maibé laiha mudansa ba saláriu no eskalaun.

Rekruta professor sira hodi prenxe dixiplina ne’ebé laiha profesór sira no tenke fó atensaun ba problema menus rekursu umanu ka profesór sira.

MEJD tenke aselera lalais inaugurasaun ba eskola tékniku vokasionál rua iha Atabae, tanba bazea ba fiskalizasaun ne’ebé reprezentante povu iha Parlamentu Nasional (PN) katak edifísiu iha ona kondisaun hodi realiza ona aprendizajen.

Tenke hadia mekanizmu subsídiu ba kargu xefia gabinete diretivu eskola tékniku vokasionál sira, tanba sira mós iha direitu atu hetan subsídiu.

Labele atraza iha transferénsia orsamentu ba merenda eskolár no labele atraza iha orsamentu ba konsensaun eskolár, nune’e profesór sira labele halo dívida iha kióske sira.

Prezidente Parlamentu Nasionál, Deputadu Aniceto Longuinhos Guterres Lopes, hateten relatóriu Komisaun G nian ne’e, ajuda efikasia no efisiénsia servisu Governu nian, nune’e sei submete ba ministéiru relevante atu tau atensaun.

Reprezentante Governu, Ministru ba Asuntu Parlamentár no Komunikasaun Sosiál (MAPKOMS), Francisco Jeronimo, hateten rejista hela preokupasaun no rekomendasaun hirak ne’e no sei enkamiña ba MEJD.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here