Diretór STAE Munisípiu Bobonaro, Mariano Viegas Amarál. Imajen Tatoli/Sérgio da Cruz.

BOBONARO, 17 janeiru 2022 (TATOLI) – Eleitór na’in-69.950 hosi munisípiu Bobonaro sei partisipa eleisaun prezidensiál ne’ebé sei realiza iha loron 19 marsu 2022 tanba rejista ona iha Sekretariadu Tékniku Administrasaun Eleitorál (STAE).

“Hahú hosi janeiru 2021 to’o  fali loron14 janeiru 2022 ita rejista eleitór foun 3.909, eleitór tuan ne’ebé mai hadi’a ne’e totál 3.302, totál 7.211, no ita mós konsege elimin ba eleitór mate no kartaun dupla totál 1.037, konta mós ho sira tuan uluk ne’e, eleitór hamutuk 69.950 mak sei partisipa iha eleisaun prezidensiál tinan 2022,” Diretór STAE Munisípiu Bobonaro, Mariano Viegas Amarál, informa Agência TATOLI, liuhosi telefónika, segunda ne’e.

Dadaun ne’e STAE Bobonaro rejista ona sentru votasaun iha munisípiu Bobonaro hamutuk 130 no estasaun votu 150 kompostu hosi postu administrativu Atabae sentru votasaun 13 no estasaun votu 15, Balibo sentru votasaun 20 no estasaun votu 24.

Nune’e mós iha postu administrativu Bobonaro sentru votasaun 40 ho estasaun votu 44, Cailaco sentru votasaun 15 no estasaun votu 16, Lolotoe sentru votasaun 15 no estasaun votu 15, enkuantu postu admnistrativu Maliana Vila totál sentru Votasaun 28 no estasaun votu 36.

Hosi fatin hirak-ne’e, STAE mós rejista sentru votasaun no estasaun votu hamutuk 45 mak la asesu estrada, la asesu eletrisidade 37, no iha sentru lima mak la asesu liña telekomisaun, maibé hosi difikuldade hirak-ne’e la sai obstákulu ba ekipa sira atu asegura materiál sensitivu no non-sensitivu sira iha loron eleisaun tanba iha ona planu atu rezolve.

“Ami prevee ona orsamentu iha OJE 2021 ba sira-ne’ebé la asesu eletrisidade, ita prepara ona atu aluga jegadór, ba fatin ne’ebé karreta tama ladi’ak ita hatún sasan iha dalan, ita selu fali pesoál sira lalin materiál sensitivu ho non-sensitivu sira, depende ba distánsia. Sé bessik ita tau $25 to’o $30, se dook bele to’o $40 to’o $50, maibe sira-ne’e sei akompaña hosi ofisiál supervizaun no seguransa,” nia katak.

Atu asegura materiál  sensitivu no la sensitivu sira iha eleisaun prezidensiál 2022, STAE Bobonaro rekruta ona brigada 130 no ofisiál eleitórál 1.500.

Hosi brigade na’in-130 ne’e kompostu hosi postu administrativu Atabae 13, ofisiál eleitóral 150, Balibo brigada 20, ofisiál eleitóral 240, Bobonaro brigada 40, ofisiál eleitóral 440.

Nune’e mós Cailaco brigada 15, ofisiál eleitóral 160, Lolotoe brigada 14, ofisiál eleitóral 150 no postu adminístrativu Maliana Vila iha brigada 28 no ofisiál eleitorál 360.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here