DILI, 14 janeiru 2022 (TATOLI) – Formasaun futeból juvenil ne’ebé estabelese hosi Federasaun Futeból Timor-Leste (FFTL) iha territóriu nasionál hatudu progresu di’ak tanba promove labarik sira hahú hosi baze.
Xefe Departamentu Juvenil Federasaun Futeból Timor-Leste (FFTL) Gaspar Quintão, informa, rezultadu formasaun Juvenil ne’ebé estabelese iha munisípiu 12 no Rejiaun Administrativa Espesiál Oé-Cusse Ambeno (RAEOA)durante ne’e hatudu progresu di’ak.
Nia dehan, formasaun ne’e hatudu rezultadu di’ak tanba dadaun ne’e labarik sira barak mak iha vontade atu partisipa iha atividade formasaun ne’e.
“Labarik sira-ne’e hosi Baucau, depois jogu sub sira hosi Covalima inklui mós feto barak maka hosi programa ne’e tama ona selesaun. Ida-ne’e ita hahú pasu primeiru,” nia informa ba Agência Tatoli, iha Dili, sesta ne’e.
Maske rezultadu di’ak maibé FFTL nafatin iha espetativa mellora formasaun sira iha territóriu nasionál nune’e iha tinan lima oin mai bele hetan jogadór ho talentu boot molok tama iha faze selesaun tanba jogadór juvenil tenke iha esperiénsia bázika kona-ba futeból nian.
FFTL apoia ona ekipamentu sira hanesan farda, bola no fasilidade sira seluk nune’e iha tinan ne’e sei realiza tán atividade festivál ba iha munisípiu 13 inklui RAEOA atu atrai no motiva labarik feto-mane ho idade 6 to’o 12 iha área futeból nian.
“Ami-nia objetivu mak ne’e bainhira kaundu sira partisipa barak, entaun labarik iha barak mós interese hakarak sai jogadór,” nia katak.
Dadus provizóriu kona-ba labarik sira-ne’ebé partisipa iha formasaun juvenil iha territóriu nasionál hamutuk na’in 300-resin.
Jornalista : Sérgio da Cruz
Editór : Evaristo Soares Martins