Movimentu Quadru Rezisténsia Apoiu Xanana (MOQURA-X) realiza konferénsia iha Salaun Don Bosco Comor. Imajen/Espesiál.

DILI, 15 janeiru 2022 (TATOLI)–Movimentu Quadru Rezisténsia Apoiu Xanana (MOQURA-X), sábadu ne’e, hala’o konferénsia hodi deklara katak MOQURA-X nia ezisténsia atu afirma prinsípiu libertasaun ba povu iha eleisaun prezidensiál 2022 no eleisaun parlamentár 2023.

Portavóz MOQURA-X, Cesar Valente de Jesus ”Pilotu”, hateten movimentu ida ne’e hamriik ho kuadru rezisténsia hosi estafeta kaixa, selkom, nurep zona, sub rejiaun ba to’o rejiaun ho objetivu prinsipál atu fó mensajen ba rezisténsia hotu katak ita la funu para ikus mai kria fali situasaun ida inserteza ba rai no povu ida-ne’e.

“Ami apoiu maun boot Xanana laloos atu ba kaer ukun de’it. Maibé ami apoiu para atu hamutuk hodi ultra pasa situasaun ida-ne’e. Tanba lideransa polítiku balun ko’alia matak situasaun di’ak hela maibé iha kraik enfrenta situasaun ida-ne’ebé inserteza. MOQURA-X nia ezisténsia hodi afirma prinsípiu libertasaun ba povu iha eleisaun prezidensiál oo eleisaun lejilativu,” Portavóz MOQURA-X ne’e hateten ba jornalista sira iha salaun Don Bosco, Comoro.

Eis Deputadu CNRT ne’e afirma, atu ultra pasa situasaun inserteza durante tinan haat nia laran ne’e, tanba MOQURA X haree ba kualidade lideransa ne’ebé bele asegura ema hotu, nune’e halo desizaun hodi apoiu Xanana Gusmão no Partidu CNRT iha eleisaun prezidensiál no lejislativu atu bele halo mudansa iha nasun ne’e.

Sekretáriu Interinu Partidu Concelho Nasionál Rekonstrusaun Timorense (CNRT), Jacinto Rigoberto, hateten CNRT nu’udar partidu boot ho lideransa Xanana Gusmão ninian sente laran metin tebe-tebes ho prezensa movimentu bara-barak ne’ebé deklara ho sira-nia vontade rasik hakarak apoiu Xanana Gusmão.

“Ohin, iha ita-nia leet movimentu ida-ne’ebé mak hotu-hotu hatene MOQURA-X ne’ebé mak rejistu ona iha Partidu CNRT no durante ne’e CNRT akompaña sira-nia atividade. Ami hatene MOQURA-X determina tebes atu apoiu Xanana Gusmão no CNRT,” nia dehan.

Ho ida-ne’e, lori CNRT nia naran apresia no agradese ba inisiativa kuadru, lideransa MOQURA-X nian, tanba hatudu katak sidadaun no maioria populasaun preokupa ho situasaun rai-laran ne’ebé mak hasoru hela dezafiu no obstákulu boot iha nasaun ne’e.

“Sira lakohi povu no rai doben ida-ne’e atu terus iha tempu ida-naruk. Ne’eduni momentu oportunu ida-ne’e atu tama ba festa demokrasia kada grupu no indivídu deside atu haree figura no partidu ida-ne’ebé mak bele garante atu lori hikas pás, estabilidade no bele hadi’a ekonomia iha rai-laran,” nia dehan.

Entretantu, Movimentu Quadru Rezisténsia Apoiu Xanana liuhosi konferénsia ne’e deklara sei loke tan ninia estrutura iha munisípiu haat inklui Ermera, no hafoin ramata konferénsia MOQURA X nian sei orienta para hahú ona planu atu tama ba rejiaun Naga Funu no Ponta Leste.

Jornalista : Tomé Amado

Editor       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here