Primeiru-Ministru, Taur Matan Ruak. Imajen TATOLI/Egas Cristóvão.

DILI, 14 janeiru 2022 (TATOLI)-Primeiru-Ministru, Taur Matan Ruak, husu atensaun ba komunidade ne’ebé hela iha rai-lolon, mota-ibun no tasi-ibun atu kuidadu an hosi dezastre naturál ne’ebé akontese.

Notísia Relevante: MOP identifika estragu 117 impaktu hosi dezastre naturál

“Agora dadaun mensajen sira tama iha ita-nia telefóne barak liu mak meteorológia nian, katak koidadu ita-boot hela iha rai lolon karik koidadu ita-boot nia oan, mota ibun no tasi ibun karik koidadu. Ida-ne’e hatudu katak iha tempu saida de’it dezastre tuku ita-nia odamatan, ne’ebé ita tenke atensaun,” Primeiru-Ministru (PM), Taur Matan Ruak, hateten lia hirak ne’e iha serimónia diálogu aberta ho Autoridade Komunitáriu no komunidade, iha Sentru Konvensaun Dili, (CCD, sigla portugés), sesta ne’e.

Xefe Governu ne’e relata, iha 2020 estragus kuaze ultrapasa millaun $50, sidadaun sira-nia vida destroidu no iha 2021 pior liután tanba hetan estargu kuaze millaun $300, no barak seidauk konta.

“Ami foin daudaun ba Manatutu, Baucau, Lospalos, Tasi Feto no Tasi Mane ba Viqeuque labele halai fali mai iha Viqueque to’o mai iha Baucau mak foin ba fali. Hosi Viqueque atu ba Same la di’ak fila-fali hosi Viqueque mai Baucau, Baucau, Manatutu, Díli mak ba fali Aileu maibé atu aranka sira dehan liuhosi Aileu ladi’ak. Normálmente Ministériu Obra Públika no ita-nia sidadaun sira hadi’a fatin atu ami liu,” Xefe Governu ne’e informa.

Entretantu, hafoin inundasaun iha loron 04 abril 2021, ema hamutuk na’in-34 mak mate no na’in-14 mak lakon iha nível nasionál no mós familia hamutuk 30.322 mak afeta ba inundasaun, ne’ebé entre familia sira ne’e iha familia 24.816 hosi Munisípiu Díli no uma hamutuk 4.231 mak hetan estragu.

Hosi númeru ne’e, iha familia 130 mak hela iha sentru evakuasaun neen (6), ne’ebé kompostu hosi, sentru evakuasaun Dom Boscu iha vítima hamutuk 35, hosi númeru ne’e iha familia 14 mak deside fila ona ba munisípiu orijinál no na’in-ualu (8) deside fila ba Díli, inklui mós familia 13.

Nune’e, iha sentru evakuasaun Bedik Hera iha familia 25, hosi númeru ne’e iha familia ida (1) deside fila ba munisipiu orijinál no familia 24 sei mantein iha Hera hodi hein desizaun Governu.

Iha sentru evakuasaun EBC Hera iha familia 14, hanesan familia tolu (3) deside fila ba munisipiu orijinál no familia rua (2) deside hela iha díli, nune’e mós familia sia (9) sei hein desizaun Governu.

Iha sentru evakuasuan Kampu Real Madrid iha familia hamutuk 41, hanesan 21 deside fila ba munisipiu orijinál, familia 15 fila ba díli no lima (5) sei hein desizaun Governu. Nune’e, iha sentru evakuasaun Rate Ain iha familia hitu (7), hanesan familia rua (2) fila ba munisipiu orijinál no lima (5) sei hein desizaun Governu.

Enkuantu, iha sentru evakuasaun Restaurante Metiaut Vítoria iha familia ualu (8), hanesan familia lima (5) deside fila ba Díli no familia tolu (3) sei hein desizaun Governu.

Autoridade lokál husu Governu aplika dekretu-lei 33/2008

Aleinde ne’e, iha diálogu aberta ne’e, xefe suku Vila Verde, Abdul Mankoli Aranhado, husu Governu atu aplika dekretu lei 33/2008 kona-ba ijiéne no orden públika hodi fó koima ba infratór sira-ne’ebé so’e lixu arbiru iha sidade laran.

“Ami husu dekretu lei 33/2008 kona-ba ijiéne no orden públika atu aplika hodi fó koima atu nune’e sidadaun sira kumpre, hodi labele soe fo’er arbiru,” Abdul Mankoli Aranhado hateten.

Hatan ba preukupasaun ne’e, Ministru Administrasaun Estatál (MAE), Miguel Pereira de Carvalho, hateten dekretu lei númeru 33/2008 kona-ba ijiéne no orden públika durante ne’e nia parte ezize Prezidente Autoridade Munisípiu Dili atu garante komprimentu hosi sidadaun sira ba dekretu-lei refere.

“Ezemplu mak, ita asiste beibeik mak operasaun animál sira iha Dili laran no ezemplu seluk mak operasaun ba ema sira atu labele faan sasán iha trotoar leten. Maibé, defaktu dekretu lei ida-ne’e obriga atu dalan no paseiu sira-ne’ebé mak la aprópriadu la’ós atu faan sasán labele faan sasán, tanba ne’e mak ekipa jestaun merkadu Dili nian sempre ba halo operasaun sira-ne’e,” Governante ne’e esplika.

Kona-ba fó koima ba infratór sira-ne’ebé so’e lixu arbiru iha sidade laran, nia hatán, iha dekretu lei númeru 33/2008, artigu 9 kona-ba koima ba infratór sira ne’e hosi $5 to’o $500.

“Ita-nia regra iha, maibé ita-nia nasaun seida’uk iha rejime jurídiku kontra ordenasaun. Tanba ne’e, ha’u halo ona koordenasaun ho Ministru Rezidensia Konsellu Ministru (PCM, sigla portugés) atu bele aselera rejime juridiku kontra ordenasaun, atu nune’e bele fó poder ba autoridade sivil sira hanesan Autoridade Munisípál no administrasaun postu sira atu bele aplika koima ba ema sira-ne’ebé mak viola,” nia informa.

Notísia Relevante: AMD sei fó koima ba infratór sira-ne’ebé soe lixu arbiru

Jornalista : Nelia Ferenandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here