Xefe Estadu Maiór Jenerál F-FDTL, Tenente Jenerál Lere Anan Timur ho nia ezposa, hasai foto hamutuk ho ofisiais komponente Naval iha Hera, kuarta 12/1/2022 Imajen TATOLI/Antonio Dasiparu

DILI, 14 janeiru 2022 (TATOLI)–Prezidente Repúblika, Francisco Guterres ‘Lú- Olo’, husu Governu liuhosi Ministériu Defeza atu tau atensaun ba ekipamentu iha FALINTIL-Forsa Defeza Timor-Leste liu-liu Komponente Navál.

Notísia Relevante: Prezidente Repúblika louva servisu Komponente Navál F-FDTL

“Prezidente fó hanoin no rekomenda ba Governu hodi tau atensaun ba kondisaun ekipamentu F-FDTL iha komponente Navál,,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten ba jornalista sira hafoin ramata enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, seta ne’e.

Iha enkontru ne’e, Lere Anan Timur husu Governu presiza tau atensaun no halo oinsá mak membru F-FDTL sai profisionál tenke iha meiu hotu iha nia servisu, tantu komponente navál no mós komponente sira seluk hodi tau matan mós ba ben estár vida militár nian.

Antes ne’e, Komandante Komponente Navál Forsa Lijeira, Kapitaun Fragata João da Silva, hateten FALINTIL-Forsa Defeza Timor-Leste (F-FDTL), liuhosi Komponente Navál, fulan ne’e, deteta ró 60 halo peska ilegál iha tasi-mane.

“Liuhosi sistema detesaun automatika Skylight ne’ebé Komponente Naval iha, konsege deteta  iha ro hamutuk 60 mak halo peska ilegál iha fulan ne’e, iha ita-nia tasi Kosta Súl Timor-Leste,”  nia informa.

Ró 60 ne’e ne’ebé halo atividade peska ilegál hosi nasaun viziñu sira hanesan Thailandia no Vietname.

“Sistema ne’e kada loron halo detesaun otomátika ró hira mak tama hosi nasaun ne’ebé no ró tama ne’e medida hira. Ami print out hodi relata rezultadu ne’e ba nivél altu sira, maibé prontu ita nia kondisaun mak ne’e,” Kapitaun Fragata ne’e akresenta.

Maski nune’e, Komandante ne’e hateten nu’udar forsa armada ne’ebé halo atividade no kontrola másimu iha tasi-timór kontinua toma responsabilidade, maibé fasilidade la sufisiente.

Atu hola fasilidade hodi kontrola ita nian tasi ne’e, kabe ba iha polítiku sira, ba kazu ne’e Governu atu hola ka la hola, importante hala’o sira-nia misaun no kontinua relata saida mak akontese iha terrenu.

Tuir dadus hosi Governu liuhosi Ministériu Agrikultura no Peska (MAP), iha tinan 2018 ró peska ilegál hamutuk unidade 107 mak tama tasi Timór hodi na’ok ikan ho tonelada 223 ne’ebé konverte ba osan karik kuaze millaun $1.

Enkuantu, iha tinan 2019, MAP indetifika ró unidade 67 mak tama iha tasi timór halo atividade peska ilegál, ne’ebé ikan lakon hamutuk tonelada 100-resin, konverte ba osan hamutuk $800,000. Iha tinan 2018, Timor-Leste lakon ikan tonelada 223.

Notísia Relevante: Lere husu Governu investe iha rekursu umanu-infraestrutura ba Komponente Navál

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here