Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen TATOLI/Osória Marques.

DILI, 14 janeiru 2022 (TATOLI)—Diretór Jerál Ministériu Solidariedade Sosiál no Inklizaun (MSSI), Rui Manuel Gago Exposto, hateten posibilidade MSSI sei implementa programa “Bolsa da Mãe ba Jerasaun Foun” iha fulan-marsu ka fulan-abríl nia laran.

Notísia Relevante: 2021, Governu halo pagamentu ba benefisiária bolsa da mãe 48.686

“Ita sei implementa programa bolsa da mãe ba jerasaun foun iha fulan-marsu ka abríl nia-laran. Daudaun ne’e ami nafatin halo diskusaun tanba progrma Bolsa da Mãe ba Jerasaun Foun ne’e ami hakarak uza sistema dijitalizasaun ba iha prosesu rejistu, prosesu pagamentu no mós prosesu monitorizasaun nian,” Diretór Jerál MSSI ne’e hateten ba Agência TATOLI iha nia knaar fatin Caicoli, Dili, sesta ne’e.

Nia hateten, ekipa tarefa téknika Ministériu Solidariedade Sosiál no Inkluzaun (MSSI) nian agora dezeña hela tanba hakarak iha transparénsia ba públiku no sei halo pagamentu hanesan ho família kada uma-kain.

“Ami lakohi bainhira prosesu pagamentu sai polémika iha públiku tanba ne’e ami hakarak duni uza sistema dijitalizasaun ne’e,” nia dehan.

Programa Bolsa da Mãe ba Jerasaun Foun ne’e sei iha diferensa ho bolsa da mãe ne’ebé la’o daudaun tanba nia universál katak ema hotu bele asesu, maibé bolsa da mãe ba jerasaun foun ne’e ba labarik kiik sira no ninia kuantidade selu ba benefisiáriu la hanesan.

Iha fulan-marsu ka abril bainhira implementa mak iha nia impaktu makaas mak automatikamente bolsa da mãe ne’e bele esklui mesak, tanba laiha impaktu hosi programa ne’e ba benefisiáriu.

Notísia Relevante: OJE 2022: PN aprova millaun $22,7 ba MSSI

Tanba, programa ne’e nia valór orsamentu la hanesan ho bolsa da mãe atuál, mak hanesan ba inan isin-rua ho nia valór orsamentu $15 kada fulan to’o nia partu, no bainhira bebé ida moris to’o nia atinje ona tinan tolu, nia hetan $20 kada fulan no inan ne’e la hetan ona maibé bebé ne’e mak hetan no estende to’o tinan neen (6).

“Ida-ne’e ita halo fazeadamente, nune’e ita konsentra uluk ba tinan tolu. Hafoin ne’e ita aumenta tinan haat to’o tinan neen,” nia hateten.

Programa ne’e MSSI servisu hamutuk ho Ministériu Saúde atu sidadaun hotu-hotu bainhira nia isin-rua, nia tenke asesu ba fasilidade saúde hodi hetan atendimentu. Bainhira deteta ona katak nia isin-rua, nia sei rejistu tama iha programa bolsa da mãe ba jerasaun foun.

Programa bolsa da mãe atuál ba labarik sira kuzae hamutuk 101.000-resin mak sai benefisiáriu.

Notísia Relevante: Implementa “Bolsa da Mãe Jerasaun Foun”, MSSI husu adisionál millaun $6

Jornalista  : Osória Marques

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here