Ministru Edukasaun Juventude no Desportu, Armindo Maia. Imajen TATOLI/Egas Cristóvão

DILI, 14 janeiru 2022 (TATOLI)–Ministru Edukasaun Juventude no Desportu (MEJD), Armindo Maia, hateten, parte ministériu presiza diskute estatutu profesór kontratadu 5.203 ho Komisaun Funsaun Públika (KFP), nune’e bele foti desizaun ruma hodi aprezenta ba Konsellu Ministru (KM) hodi hetan aprovasaun.

“Ha’u ba fatin hotu iha territóriu nasaun ne’e, profesór kontratadu barak mak husu mai ha’u, Ministru ami ne’e atu kontratadu to’o bainhira, to’o mate ka halo nusa? tanba profesór balun laiha ona. Ha’u hateten ba sira sim, ne’e todan boot ida ne’ebé ha’u sei esforsa atu rezolve neineik,” Ministru Armindo relata iha Sentru Konvensaun Dili (CCD, sigla portugés), sesta ne’e.

Tuir Ministru, MEJD iha kompeténsia atu deside profesór sai permanente, maibé presiza pareser ruma hosi KFP hodi bele aprezenta ba KM.

“Profesór kontratadu iha territóriu nasionál durante ne’e barak maka reforma ona no barak mós mate. Ne’e duni atu rezolve sira-nia problema estatutu ba permanente presiza desizaun koletivu ida,” governante ne’e akresenta.

Daudaun ne’e profesór kontratadu 5.203 iha territóriu nasionál ne’ebé hanorin iha eskola sira simu saláriu vensimentu hosi MEJD, tanba ne’e ministériu halo esforsu rezolve asuntu ne’e hodi bele muda estatutu.

“Bainhira ita labele halo dala-ida, ita bele halo fazeadamente naran katak ita bele regula tiha estatutu profesór kontratadu,” Ministru tenik.

Notísia relevante: MEJD sei verifika tan profesór voluntáriu 4.000 iha territóriu nasionál

Entretantu, MEJD daudaun ne’e halo ona verifikasaun dadus ba profesór voluntáriu iha munisípiu sira, enkuantu iha Dili mak seidauk konklui no hosi prosesu verifikasaun agora atinje ona 4.000.

“Bainhira hosi Dili nia mak tama tan parese bele atinje 5.000. Prosesu verifikasaun dadus ne’e atu prienxe vaga 975 ne’ebé ita prepara ona. Ita presiza tais didi’ak atu ema ne’ebé tama iha rekrutamentu ne’e di’ak, labele ema arbiru dada tama hotu iha prosesu ensinu aprendizajen nia laran,” governante ne’e tenik.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here