Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 14 janeiru 2022 (TATOLI)—Governu liuhosi Ministériu Administrasaun Estatál (MAE), tinan ne’e, sei kontinua reabilita sede suku sira iha territóriu naionál hodi fasilita xefe sira hala’o sira-nia knar ho di’ak.

“Ha’u hanoin, VIII Governu Konstituisionál sei kontinua reabilita nafatin sede suku sira iha territóriu nasionál. Tanba, ita-boot sira-nia sede suku ne’e hahú konstrui iha tinan 2005-2006 ho orsamentu  $7000 ne’ebé entrega direta ba xefe suku ida-idak hodi hala’o knar bá,” Ministru  Administrasaun Estatál, Miguel Pereira de Carvalho, hato’o lia hirak ne’e,  iha serimónia diálogu aberta entre Primeiru-Ministru, Taur Matan Ruak, ho Autoridade Komunitáriu no komunidade, iha Centru Convensaun Díli (CCD), sesta ne’e

Hafoin tinan 14-15 nunka halo reabilitasaun sede suku sira, tanba ne’e VIII Governu Konstituisionál iha tinan 2021 hodi reabilita ona sede suku 250 iha terotóriu nasionál no tinan ida ne’e sei reabilita sede suku 150 no sede suku mak sei reabilita iha tinan 2023.

Reabilitasaun sede suku iha munisípiu dili nian, tinan kotuk reabilita ona sede suku neen (6) no tinan ne’e mós sei kontinua reabilita sede suku 11, tanba postu administrative sei haketak hosi Dili entaun totál suku Dili hamutuk 31 no falta de’it sede suku 14 sei reabilita iha tinan oin.

“Ha’u atu informa ba ita-boot sira, tinan rua tutuir malu ne’e ita reabilita sede suku no kontinua reabilita. Molok VIII Governu konstituisionál nia mandatu ramata, ita reabilita hotu ona sede suku liuhosi programa dezenvolvimentu suku (PNDS) no Programa Dezenvolvimentu Integradu Munisipál (PIDM),” nia esplika.

Iha ámbitu hadi’a adminitrasaun suku sira hodi reabilita sede suku bele uza osan ne’e hodi sosa kadeira no meza atu fasilita xefe suku sira-nia servisu. Agora falta mak komputadór no printer ne’ebé mak tinan kotuk sosa ona komputadór 400 sei iha prosesu tanba ró tula sasán seidauk to’o iha Dili.

“Ami sei haruka ba ita-boot sira iha sede suku ida-idak iha Dili no munisípiu sira ami la haluha ita-boot sira-nia nesesidade ba sede suku ida-idak,” nia hateten.

Enkuantu, Parlamentu Nasionál aprova Orsamentu Jerál Estadu (OJE) tinan 2022 ba Ministériu Administrasaun Estatál ho montante $33,723,71 no OJE 2022 ne’e Prezidente Repúblika promulga ona iha loron 03 janeiru tinan 2022.

Hosi totál orsamentu ne’e, aloka ba kategoria saláriu vensimentu $3,670,598, bens servisu $7,447,288, kapitál menór $1,037,800, kapitál dezenvolvimentu $450,000 no transférensia públika $21,118,045, no orsamentu ne’e sei finansia ba programa tolu, sub-programa lima no atividade 21.

Orsamentu MAE ba tinan 2022 ne’e atu finansia ba programa prioridade tolu mak dezsentralizasaun administrativa no podér lokál sei gasta $24,201,199, boa-governasaun no jestaun institusionál sei gasta $9,496,016 no igualdade jéneru no inkluzaun sosiál sei gasta $26,516.

Programa dezsentralizasaun administrativa no podér lokál, ho nia objetivu médiu prazu garante ba implementasaun efetiva hosi dezsentralizasaun administrativa no podér lokál.

Programa ne’e ho nia sub-programa dezenvolvimentu lokál, no atividade superviziona atividade ba dezenvolvimentu lokál, jestaun ba programa nasionál hosi dezenvolvimentu suku (PNDS), apoia ba administrasaun suku, inklui apoia no koordena planeamentu ba dezenvolvimentu integradu munisipál (PDIM).

Sub-programa dezsentralizasaun administrativa, ho nia atividade superviziona atividade sira hosi dezsentralizasaun administrativa no podér lokál, apoia no presta asisténsia téknika ba autoridade no administrasaun munisipál iha jestaun finansa no administrasaun patrimóniu munisípiu, instalasaun ba orgaun hosi dezsentralizasaun administrasaun no poder lokál, moderniza administrasaun lokál no kapasita rekursu umanu, promosaun ijiéne no organizasaun urbana, inklui koordena no apoia munisípiu sira no postu administrativu ho prosesu polítiku dezsentralizasaun.

Ba programa boa-governasaun no jestaun institusionál ho nia sub-programa boa-governasaun, no atividade planeamentu, dezenvolvimentu estratéjiku no orientasaun polítika, inspesaun, fiskalizasaun no auditória, koordena no jere servisu korporativu no mós koordena asisténsia téknika espesializada ba órgaun no servisu sentrál hosi ministériu.

Sub-programa jestaun institusionál, nia atividade jestaun finanseira, administrasaun no lojístika, planeamentu, monitorizasaun no estatístika, jestaun rekursu umanu, organizasaun no jestaun ba eventu, aprovisionamentu no jestaun ba kontratu no mós jestaun ba sistema informasaun no komunikasaun.

Kona-ba programa igualdade jéneru no inkluzaun sosiál, ho ninia sub-programa mak implementasaun ba NAP-GBV, ho atividade koordenasaun no apoia ba kapasitasaun autoridade lokál no líder komunitáriu iha área igualdade jeneru no inklusaun sosiál.

Jornalista  : Celestina Teles

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here