Xefe suku sira hato’o preokupasaun ba Governu iha diálogu ne’ebé Primeiru-Ministru, Taur Matan Ruak, realiza iha Salaun Sentru Konvensaun Dili (CCD, Sigla portugés), sesta (14/01). Imajen Tatoli/Francisco Sony.

DILI, 14 janeiru 2022 (TATOLI)—Ministériu Adminisrasaun Estatal (MAE), husu autoridade munisipál servisu hamutuk ho autoridade lokál atu atualiza dadus populasaun sira-nian, tanba iha 2020 ne’e Governu distribui cesta bázika ba populasaun sira-ne’e hasoru difikuldade.

“Ha’u espera cesta bázika tuir mai, ita uza lista atualizadu. Ha’u husu ona autoridade munisipál sira, servisu hamutuk ho líder komunitária atualiza fali dadus ne’e, nune’e sesta bazika tuir mai dadus ida-ne’ebé atualizadu, nune’e ita-nia populasaun labele ko’alia barak ba ita hanesan tinan kotuk,” Ministru Adminisrasaun Estatál (MAE) ne’e hateten lia hirak ne’e iha serimónia diálogu aberta ho autoridade lokál no komunidade, iha Sentru Konvensaun Dili (CCD, sigla portugés), sesta ne’e.

Iha fulan-abril no maiu 2020, nia dehan, Timor-Leste enfrenta situasaun defísil Governu husu autoridade lokál atu fornese dadus populasaun sira-nian ne’e, iha problema ho dadus populasaun sira-nia ne’ebé submete ba MAE ne’e la hanesan.

Governante mós esplika, foin lalais dadus populasaun iha munisípiu Dili ne’e benefísiáriu cesta bázika ne’e hamutuk rihun 308, reklamante iha 13.000 maibé Governu konsege rezolve reklamante 12.000

“Iha Dili, dadus benefísiáriu apoiu cesta bázika hamutuk rihun 308 iha reklamante hamutuk 13.000 no hosi númeru ne’e ita konsege rezolve 12.000. Ita entrega ona ba dadus rihun 308 ne’e, nune’e lista sai kompletu fila fali,” nia dehan.

Antes ne’e, iha loron 13 fulan-agostu 2021, Governu liuhosi Sekretária Estadu Kooperativa (SECoop, sigla portugés) ensera ona distribuisaun Cesta Bázika iha Munisípiu Aileu, nune’e SECoop   responsabiliza distribuisaun Cesta Bázika iha munisípiu Ainaro, Aileu, Manufahi, Covalima, Liquiça, Manatuto no Lautém ne’e ba ema hamutuk 432.592 hosi uma-kain 70.000-resin.

Jornalista  : Celestina Teles

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here