Diretór Nasionál Ensinu Rekorrente-MEJD, José Artur Viana. Imajen TATOLI/Nelia Fernandes

DILI, 14 janeiru 2022 (TATOLI)–Komisaun Nasionál Timor Leste ba UNESCO (KNTL-UNESCO) tinan ne’e sei apoiu tan fundu $60.000 ba Diresaun Nasionál Ensinu Rekorrente-Ministériu Edukasaun Juventude no Desportu (MEJD) hodi harii tan Sentru Aprendizajen Komunitária tolu atu aselera programa analfabetizmu iha territóriu nasionál.

Diretór Nasionál Ensinu Rekorrente-MEJD, José Artur Viana, relata katak orsamentu ne’ebé parseiru dezenvolvimentu fó hodi reforsa programa ensinu rekorrente inklui kompleta tan fasilidade iha sentru laran hanesan kadeira no meza.

“Ita-nia Governu prevee de’it orsamentu atu apoiu subsídiu ba sentru sira ne’ebé iha ona, nune’e reforsa prosesu ensinu aprendizajen iha sentru sira, maibé atu harii sentru foun ministériu la prevee,” Diretór hateten ba Agência TATOLI, iha ninia knaar fatin, Villa verde, sesta ne’e.

Notísia relevante: DSEMB halo restruturasaun Sentru Aprendizajen Komunitária Baucau hodi hahú atividade

Iha tinan ne’e, planu atu harii tan iha postu Uatucarbau munisípiu Viqueque, postu Ainaro villa munisípiu Ainaro, no postu Hatulia munisípiu Ermera, nune’e tinan-lima tuir planu sei atinje sentru 15 iha territóriu nasionál.      

Komisaun nasionál aloka ba kada sentru ho montante $20.000 hodi aselera prosesu konstrusaun no kompleta fasilidade.

Nune’e, iha ona sentru hitu mak estabelese ona iha munisípiu sira, ne’ebé tinan kotuk harii sentru tolu iha Covalima, Bobonaro no Metinaro.

Nune’e mós, Sekretáriu Ezekutivu KNTL-UNESCO, Francisco Barreto, haktuir orsamentu ba konstrusaun sentru tolu komisaun hetan liuhosi UNESCO Korea.

”Ba sentru ida ita gasta $20.000, kompostu hosi konstrusaun $15.000, apoiu fasilidade sentru hanesan sosa kadeira no meza ba kada sentru 20, inklui armáriu, komputadór ba kada sentru rua no printer hamutuk ho kustu $5.000. Orsamentu ba tinan ne’e hanesan nafatin tinan kotuk,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here