Primeiru-Ministru, Taur Matan Ruak, hamutuk ho membru Governu hala’o diálogu ho Autoridade munisipál no autoridade lokál iha Dili, iha Sentru Konvensaun Dili (CCD, sigla portugés). Imajen TATOLI/Egas Cristóvão.

DILI, 14 janeiru 2022 (TATOLI)—Governu liuhosi Ministériu Saúde (MS), tuir planu sei estabelese hospitál munisipál iha kapitál Dili liu-liu iha sentru saúde Vera Crúz no sentru saúde Comoro.

Notisia Relevante: PN aprova OJE 2022 ba MS iha espesialidade

“Iha Dili, ami planeia hela levantamentu ne’e halo ona ba iha sentru saúde Comoro no sentru saúde Vera Crúz no dala ruma karik ami sei hahú dahuluk iha Comoro, tanba Comoro-nia populasaun boot liu Vera Crúz. Maibé, hanoin katak Vera Crúz no Comoro sai nafatin prioridade ba Ministériu Saúde atu haree eleva sira-nia nivel sentru nian, hosi sentru saúde ba hospitál munisipál,” Ministra Saúde (MS), Odete Maria Freitas Belo, hateten iha serimónia diálogu aberta ho Autoridade Komunitáriu no komunidade, iha Centru Convensaun Díli (CCD), ohin.

Nia hateteten, atu bele eleva sentru saúde Vera Crúz hanesan ospitál munisípál, lei ida iha baze legál la ko’alia kona-ba ospitál munisipál maibé Governu sei elabora lei kona-ba estabelesimentu ospitál munisipál ne’e.

“Ami koko atu haree estabelese no elabora hela lei ida-ne’e. Maibé iha tempu hanesan bainhira elabora lei ami mós halo ona levantamentu ba iha Sentru Saúde no mós Sentru Saúde Internamentu ne’ebé mak sira kobre ema liu rihun 50. Nune’e, bainhira iha ita-boot sira-nia sentru saúde ka sentru saúde internamentu ne’ebé nia komunidade no populasaun liu rihun 50, ida-ne’e iha direitu atu harii ospitál munisípál,” nia dehan.

Autoridade lokál husu Governu estabelese mobile klínika iha aldeia Kasnafar

Entretantu iha diálogu ne’e, Xefe Suku Vila Verde, Abdul Mankoli Aranhado, husu Governu atu harii mobile klínika iha aldeia Kasnafar, Suku Dare, nune’e komunidade sira bele asesu ba tratamentu saúde.

“Ami husu atu harii mobile klínika ida iha aldeia Kasnafar, suku Dare, tanba dook komunidade sira la asesu tratamentu saúde ho di’ak,” Abdul Mankoli Aranhado ateten.

Hatan ba preukupasaun ne’e Ministra Saúde (MS), Odete Maria Freitas Belo, hateten atu harii postu saúde iha aldeia Kasnafar labele, tanba rai ne’ebé komunidade sira hatudu atu harii postu saúde besik loos mota.

“Los duni ita-boot sira iha ona koordenasaun hamutuk ho Diretora Servisu Saúde Munisípiu Dili ni’an, maibé rai ne’ebé ita-boot sira hatudu ne’e ita-boot sira iha konsiénsus atu hatudu fila-fali rai seluk, tanba terrenu ne’ebé hatudu ne’e besik mota. Entaun, favor ida koordena didi’ak fali asuntu ida-ne’e, nune’e haree fila-fali nia kontinuasaun ne’e halo nusa,” Governante ne’e hateten.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here