EDTL, E.P reliza enkontru jerál komisaun ezekutivu ho kargu xefia nasionál no munisípiu sira, iha salaun Luz Clarita, Bairo Formosa, sesta (14/01). Imajen TATOLI/Francisco Sony

DILI, 14 janeiru 2022 (TATOLI)–Eletricidade de Timor-Leste, Empreza Públika (EDTL, E.P), sesta ne’e, realiza enkontru jerál konsellu ezekutivu ho jestór munisípiu sira, hodi fó orientasaun garante fornesimentu  enerjia eletrisidade ho kualidade ba kliente sira.

“Objetivu enkontru ohin ne’e atu fó orientasaun ba kada kargu xefia sira hosi munisípiu hodi hapaar ho orientasaun serbisu iha tinan ne’e, atu kontinua garante fornese ahi hodi kliente sira no hamenus frekuénsia ahi-mate liuhosi prevensaun preventiva ho prevensaun manutensaun programada,” Komisáriu Ezekutivu Servisu Tékniku, EDTL, E.P, Latino Jerónimo, hateten, iha Luz Clarita, Bairro Formosa.

Notísia relevante: EDTL introdús projetu eletrifikasaun pakote 44 ba empreza interesadu

Tinan 2022 hanesan tempu ba EDTL, E.P atu  luta maka’as ba servisu eletrisidade, tanba tuir projesaun tinan ne’e tenke hetan reseita milliaun $40.

Orsamentu tinan ne’e ba EDTL, E.P hamutuk millaun $90, gastu previstu millaun $180, no saldo tranzitadu millaun $29 resin.

“Nune’e, ami fó orientasaun klaru ba kargu xefia sira atu ita halo prevensaun manutensaun preventiva ba ahi labele mate no atendimentu lalais ba ahi mate, nune’e bainhira ema barak uza ahi ho di’ak, reseita mós tama” nia dehan.

Antes ne’e, EDTL, E.P simu ona kontadór pre-pagu eletrisidade faze dahuluk hamutuk 5.000 hosi kompañia indonéziu, Lidvi hodi halo instalasaun ba uma ne’ebé seidauk iha kontadór, nune’e bele intensifika rekolla reseita.

Kliente EDTL iha territóriu Timór laran tomak ne’ebé uza kontadór pre-pagu hamutuk 197.000, enkuantu ida seidauk uza pre-pagu hamutuk 75.000 maibé iha ligasaun direta no la selu.

Enkuantu, kontadór sei mai hamutuk 120.000, ne’ebé balun mai ona no balun sei prosesu, ba kliente hamutuk 75.000 ne’ebé ligasaun direita inklui projetu eletrisidade ne’ebé agora ita atu implementa.

Bazeia ba lei númeru 33/2016, 16 agostu, kona-ba tarifa EDTL inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Antes ne’e, EDTL rejista konsumidór dada ahi ilegál pur volta 30.000, tanba laiha pre-pagu foun atu halo instalasaun.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here