Ró Berlin Ramelau atraka hela iha APORTIL, dezde kinta to'o s sesta tanba avaria. Imajen Tatoli/Abílio Elo Nini.

DILI, 14 janeiru 2022 (TATOLI) – Autoridade Portuáriu Timor-Leste (APORTIL), daudaun ne’e hamosu alternativa hodi solusiona pasajeiru sira-ne’ebé hakarak fila ba Oé-Cusse tanba ró Berlin Ramelau avaria.

Prezidente Konsellu Administrasaun, Autoridade Portuáriu Timor-Leste (APORTIL), Flávio Cardoso Neves, fó-sai katak, daudaun ne’e prepara hela alternativa rua hodi solusiona pasajeiru sira-ne’ebé hakarak fila ba Oé-Cusse tanba daudaun ne’e ró Berlin Ramelau avaria hela.

“Ita iha prepara ona opsaun rua, primeiru billete tenke fó fila, segundu ita transfere fali ró Sucessu. Ho konsekuénsia ne’ebé mak akontese tanba ró Sucessu folin la hanesan, entaun APORTIL tenke responsabiliza, tanba iha Berlin Ramelau folin $8, maibé iha Sucessu $10, entaun APORTIL tenke aumenta $2 kada ema-ida, nune’e pasajeiru sira bele fila ona ba Oé-Cusse, karik laiha ona solusaun konserteza tenke fó fila osan,” Prezidente Konsellu Administrasaun, Autoridade Portuáriu Timor-Leste (APORTIL), Flávio Cardoso Neves, ko’alia iha nia kna’ar-fatin, sesta ne’e.

Maske APORTIL prepara ona opsaun rua ne’e, maibé ekipa tékniku daudaun ne’e esforsu hela atu halo operasaun ba avaria ne’e, tanba tuir ajenda ne’ebé APoRTIL simu, iha segunda tenke iha ona solusaun tanba Primeiru Ministru mós sei ba Oé-Cusse, liuhosi ró Berlain Ramelau.

“Tán ne’e maka dezde iha kinta to’o sesta ne’e, tékniku sira tenta ona atu hadi’a tuir rekursu ne’ebé maka iha, ne’ebé ami sei esforsu, ohin to’o aban sei tenta took, tuir rekursu ne’ebé iha,” nia dehan.

Kronolojia kanselamentu ne’e ho razaun ró Berlin Ramelau tuir loloos hala’o viajen hosi Dili ba Oé-Cusse iha loron kinta, tuku 09:00 dadeersan, maibé iha dadeersan ne’e karreta tanki mina ida atu tama ba ró laran, derrepente soke, rezulta mina nakfakar iha ró laran, nune’e iha kinta dadeersan to’o lokraik tékniku sira konsege rezolve.

Nune’e to’o kalan adianta-tán tanba avaria fali iha odamatan aat taka ladi’ak, tán ne’e tékniku sira sei esforsu hodi rezolve problema to’o agora seidauk iha serteza atu ba Oé-Cusse.

Tuir dadus pasajeiru ne’ebé alista ona atu viajen ba Oé-Cusse iha loron kinta 13 janeiru ne’e hamutuk ema na’in-300 resin.

Jornalista         : Abílio Elo Nini
Editór               :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here