Primeiru Ministru Taur Matan Ruak. Imajen TATOLI/Francisco Sony

ERMERA, 13 janeiru 2022 (TATOLI)–Primeiru-Ministru (PM), Taur Matan Ruak, husu ba povu Ermera atu kuidadu saúde, atu nune’e bele hala’o serbisu hodi apoia oan ba eskola.

“Ha’u hakarak husu ba imi Ermera tenki kuidadu idaidak ninia saúde, tanba saúde ne’e importante, ita bele riku maibé ita-nia saúde ladi’ak riku sira ne’e lavale buat ida. Maibé ha’u kontente loos iha ha’u-nia vizita ne’e, ha’u mai haree imi oin nabilan, matan-lakan, ne’e di’ak loos,” PM hateten iha ámbitu diálogu komunitáriu iha salaun Parokiál Gleno, kinta ne’e.

Aleinde ne’e, Xefe Ezekutivu bolu atensaun ba povu Ermera tanba hanesan munisípiu ho númeru má nutrisaun a’as, tuir fali mak Oé-cusse.

“Husu atu imi tau-matan ba oan-sira, dudu sira ba eskola sai matenek, tanba matenek loke oportunidade hodi hetan serbisu di’ak ho saláriu di’ak, edukasaun muda mundu, nasaun no vida família nian. Tanba uluk inan-aman sira hatais hakfolik de’it maibé dudu oan ba eskola no sai ema boot, ne’e hatudu katak sira lori sira-nia kiak no kbiit natón, bele dudu ita sai matenek, agora ita ho kondisaun di’ak oituan, tenki halo liu fali sira, se ita halo menus entaun sira-nia terus no kolen sauguate de’it tanba ita la banati tuir sira iha buat ne’ebé di’ak,” nia akresenta.

Iha sorin seluk, PM senti triste tanba iha prevensaun no mitigasaun COVID-19, fatór importane ida mak vasina, maibé munisípiu Ermera nu’udar munisípiu ne’ebé ho partisipasaun kiik liu kompara ho munisípiu sira seluk.

Iha kampaña vasina, Governu deside meta ida katak to’o fin tinan 2021 tenki atinje taxa vasina 80%, maibé la konsege atinje, doze dahuluk 80% liu iha nível nasionál, maibé doze daruak 70%, nível munisípiu Covalima mak nu’udar munisípiu dahuluk taxa vasinasaun a’as.

“Ikus liu mak rai ida kafe barak mak munisípiu Ermera, ida-ne’e ha’u triste loos, tanba ne’e ha’u husu favór ida ne’ebé seidauk vasina bele hakbesik-an ba sentru saúde atu vasina, ne’ebé vasina ona tenki kompleta, tanba tinan kotuk soe vasina besik 200.000 ba lixeira tanba ema laiha. Governu to’o agora seidauk sosa vasina, nasaun sira mak ajuda tanba sira hadomi ita, maibé ita na’in rasik la hadomi malu atu simu vasina hodi proteje-an hosi vírus ne’e,” PM dehan.

Biban ne’e, Xefe Governu ne’e enkoraja povu Ermera atu serbisu hamutuk ho profisionál saúde, tanba kuandu hamutuk buat ne’ebé todan sai kama’an.

Enkuantu, vasina ne’ebé fó ona ba populasaun elijível hosi tinan 18 ba leten, to’o kinta (13/01) dadeer tuku 10:00 otl, vasina iha Timor-Leste doze dahuluk atinje 83,7% doze daruak 69,4%.

Nível munisipál, munisípiu Covalima doze dahuluk atinje 96,7%, doze daruak 76,8%, tuir mak Viqueque doze dahuluk 94,3% doze daruak 82,4 no iha Dili doze dahuluk 87,6% no doze daruak 81,3%, no munisípiu Ermera mak ikus liu iha doze dahuluk foin atinje 69,3% no doze daruak 51,1%.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here