Tribunál Distritál Dili. Imajen/TATOLI

DILI, 13 dezembru 2022 (TATOLI) – Tribunál Distritál Dili (TDD) kinta ne’e adia julgamentu rona sasin na’in-rua relasiona ho prosesu providénsia kautelár publikasaun relatóriu Komisaun Justisa no Paz (KJP) Dioseze Dili tanba prokuradór Matias Soares sei ba hala’o retiru iha Lautem.

Tribunál Distritál Dili liuhosi Juis Singulár Evangelino Belo deside adia julgamentu rona sasin na’in-rua hosi mídia online Tempotimor ne’ebé rereprezenta hosi Eis-Diretór atuál Prezidente Rádiu Televizaun Timor-Leste, Empreza Públika (RTTL, E.P), José António Belo no Jornalista Ajénsia Lusa, António Sampaio tanba prokuladór titulár la marka prezensa ho razaun hala’o retiru iha munisípiu Laútem.

Maske nune’e, Tribunál Distritál Dili agradese ba sasin na’in-rua tanba oferese ona tempu to’o iha fatin julgamantu no julgamentu sei hala’o fali iha loron 26 janeiru 2022, tuku 14:00 lokraik.

Prezensa sasin na’in-rua ne’e relasiona ho publikasaun relatóriu investigasaun Komisaun Justisa no Paz ne’ebé publika hosi mídia Tempotimor no Lusa.

Kazu ne’e rejista iha tribunál númeru NUC 0278/20 CV/TDD aprezenta hosi Jurídiku-Sosiál Konsultoria (JU,S) ba Ministériu Públiku (MP) iha loron 29 setembru 2020 ho karáter urjénsia. Kazu ne’e envolve mós sasin sira seluk hanesan eis Primeiru Ministru Xanana Gusmão, Arsebispu Metropolitana Dili, Dom Virgilio do Carmo da Silva, SBD no eis Diretór KJP, Padre Hermíno de Fátima Gonçalves.

Kazu krime violasaun segredu justisa ne’e prevista iha artigu 291 Kódigu Penál (CP, sigla portugés) ne’ebé deskonfia envolve eis diretór KJP, padre Hérmino Fátima no argudu tolu seluk hanesan José Cardoso Moreira, Andre Gonçalves no Libania Martins Amaral.

Konteúdu hosi relatóriu refere kona-ba setór justisa iha Timor-Leste ne’ebé daudaun ne’e seidauk la’o ho loloos iha Timor-Leste ne’ebé  deskreve mós kazu iha uma mahon Topu Honis, Oecuse, ikus mai divulga iha mídia sosiál, liuliu facebook maske konsidera nu’udar dokumentu konfidensiál.

Artigu 291 hosi CP ne’e prevista kona-ba violasaun ba justisa segredu, númeru 1 hateten, ema-ne’ebé hasoru determinasaun legál no sein kauza justa, fó-sai ba públiku aktu prosesuál penál ne’ebé tama iha justisa nia segredu nia konteúdu ka aktu ne’ebé desizaun ida proibe tiha ona publisidade nia konteúdu, sei hetan pena prizaun tinan 1 to’o tinan 4.

Númeru 2 hosi artigu 291 ne’e hatutan, kuandu ajente halo violasaun ne’e ho meiu ba komunikasaun sosiál sei aplika pena prizaun tinan 2 too tinan 6.

Entretantu prosesu julgamentu prezide hosi Juis Singulár Evangelino Belo, Ministériu Públiku reprejenta hosi Prokuradór Matias Soares.

Jornalista       : Natalino Belo

Editór             : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here