Sekretáriu Estadu Terras no Propriedades (SETP), Mário Ximenes. Imajen Tatoli/ António Goncalves.

DILI, 13 dezembru 2022 (TATOLI)— Sekretáriu Estadu Terra no Propriedade (SETP), Mario Ximenes, apela ba komunidade sira ne’ebé okupa areadór eskola públiku iha kapitál Dili atu hamamuk ona fatin.

“Ami notifika ita nian komunidade sira ne’e hela iha areadór.  Ha’u rasik ho ekipa tuun hodi ko’alia ho sira, maibe ita nia komunidade sira ne’e mak ulun toos lakohi sai. Tanba razun dehan uma laiha, nune’e balun to’o agora seidauk sai, hodi hili kontinua hela dei’t iha fatin ne’ebá,” Sekretáriu Estadu ne’e hateten ba Agência TATOLI iha nia knaaar fatin-Colmera, kinta ohin.

Notísia Relevante:Tribunál Notifika Ona Komunidade Okupa Aredór Eskola EBC Akadiruhun

Maski nune’e, Governante ne’e hateten, nia parte sei buka dalan kontinua koordena fali ho Ministériu Edukasaun, Juventude no Desportu (ME), Ministériu Administrasaun Estatál (MAE) no Autoridade Munisípiu Dili atu hasai komunidade ne’ebé okupa areadór eskola públiku.

Tanba, SETP fó ona notifikasaun ba okupante areadór eskola públiku iha tinan 2019, nune’e husu komunidade koopera hodi sai ka hamamuk fatin.

Nia dehan, sei kontinua halo aprosimasaun ho okupante sira hodi buka meiu atubele hasai hodi labele difikulta prosesu aprendizajen iha eskola.

“Ha’u la fikza númeru serteza komunidade sira ne’ebé hela iha areadór eskola, maibé ita husu sira atu koopera, nune’e bele hamamuk fatin ne’eba, atu labele prejudika ba estudante sira  ne’ebé halo prosesu aprendizajen iha eskola,” Governante ne’e sujere.

Iha sorin seluk, Diretór Eskola Ensinu Báziku Sentrál 10 Dezembru Comoro, Calisto Guterres informa, komunidade hamutuk 52 mak daudaun ne’e okupa areadór eskola.

“Ita nia komunidade ne’ebé okupa areadór eskola ne’e estraga tiha ona imajen eskola ninian no la kontribui ba prosesu aprendizajen,” nia lamenta.

Tuir observasaun jornalista TATOLI iha eskola 10 Dezembru  hatudu okupante sira iha areadór  eskola balun hakiak animál, kuda husi, aidila no balun loke kioske.

Notísia Relevante: Komunidade Dili Sei Kontinua Okupa Areadór Eskola Públiku

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here