Prezidente Parlamentu Nasionál (PPN), Deputadu Aniceto Longuinhos Guterres Lopes, hala’o enkontru ho Ministru Prezidensia Konsellu Ministru (PCM, siglá protugés), Fidelis Manuel Leite Magalhães. Imajen Tatoli/Mídia PCM.

DILI, 13 janeiru 2022 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, kinta ne’e hala’o enkontru ho Ministru Prezidensia Konsellu Ministru (PCM, siglá protugés), Fidelis Manuel Leite Magalhães, diskute inisiativa lejislasaun ne’ebé Governu tranzita ona ba Parlamentu Nasionál iha tinan kotuk no planu lejislasaun ba tinan 2022.

Notísia Relevante: Kaleidoskópiu 2021: PN kontinua suspende proposta alterasaun lei pensaun vitalísia

“Enkontru ohin ne’e, ko’alia kona-ba inisiativa lejislasaun nian ne’ebé mak Governu halo haruka tiha ona mai Parlamentu Nasionál hodi halo balansu ba tinan 2021 no haree fali saida-saida mak sei halo fila-fali planu ba tinan 2022 nian,” Ministru Prezidensia Konsellu Ministru (PCM, siglá protugés), Fidelis Manuel Leite Magalhães, hateten ba jornalista sira hafoin ramata enkontru ho Prezidente Parlamentu Nasionál, iha Parlamentu Nasionál.

Tuir nia, Prezidente Parlamentu Nasionál espresa ninia apresiasaun ne’ebé servisu PCM halo iha tinan kotuk ho ativu no efisiente, dudu inisiativa barak mai iha Parlamentu Nasionál no mós lori inisiativa barak ba iha Prezidente Repúblika.

Nune’e mós, seida’uk konta inisiativa sira-ne’ebé halo iha ambitu servisu Governu nia laran rasik ne’ebé totál insiiativa liu 300-resin ne’ebé mak PCM halo tantu proposta-lei, dekretu-lei, rezolusaun ho dekretu Governu no inisiativa ne’e uitoan de’it mak tranzita mai iha 2022.

Durante sorumutu, Ministru Fidelis husu ba Prezidente Parlamentu Nasionál atu inisiativa sira-ne’ebé parte Governu hato’o ona ba Parlamentu Nasionál ne’ebé daudaun ne’e sei suspende hela, atu fó fila-fali prioridade iha tinan 2022 ne’e.

“Prosesu inisitiva lejislativa hirak ne’ebé haruka ona mai iha Parlamentu Nasionál ne’ebé suspende iha tinan kotuk la konsege hala’o, tanba PN atende ba kestaun urjente sira seluk inklui bainhira Orsamentu Jerál Estadu (OJE) 2022 tama. Nune’e, agora ha’u husu nafatin atu tau nafatin hanesan prioridade ba inisiativa lejislativa hirak ne’ebé mak haruka ona mai iha PN,” nia hateten.

Governu apresia ho enkorqja ne’ebé mai hosi PN ba servisu no parte sira kompromete halo servisu ne’ebé di’ak liután atu inisiativa barak bele konklui iha tinan ne’e.

Ba tinan ne’e, Governu sei prepara planu lejislativu ne’ebé iha tempu badak sei haruka ba iha PN hodi bele hatama iha kalendáriu.

“Planu lejislativu bazea ba submisaun liña ministeriál sei hato’o planu proposta mai prevee hafoin sei haruka mai PCM hodi tetu no sei hato’o fila-fali reuniaun Konsellu Ministru. Nune’e, hatene ona inisiativa saida de’it mak inklui iha planu lejislativu bainhira ramata tiha mak sei figura jerál ho totál mak prioridade duni sei haruka ba iha Parlamentu Nasionál,” nia dehan.

Notísia Relevante: Kaleidoskópiu 2021: PN aprova OJE 2022-altera pakote lei eleitorál tolu 

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here