Estasionamentu veíkulu ka parajen iha HNGV, ne’ebé finaliza ona hosi kompañia no hahú ohin ba oin utilizadór parajen bele uza, kinta 13/1/2022. imajen TATOLI/ Antonio Dasiparu

DILI,13 janeiru 2022 (TATOLI)— Ministériu Saúde (MS) inaugura estasionamentu veíkulu iha Hospitál Nasionál Guido Valadarese (HNGV) hodi fasilita Profisionál Saúde no família pasiente bele estasiona nia karreta no motór sira ho seguru.

“Estasionamentu ne’e importante ba nesesidade públiku nian liuliu profisionál saúde no vizitante sira mai HNGV, hodi vizita pasiente sira atubele para karreta no motór sira iha fatin di’ak no seguru ho gratuitu,” Diretór Jerál Serbisu Koorporativu Ministériu Saúde, Marcelo Amaral, hateten iha ámbitu inaugurasaun iha HNGV-Bidau, kinta ne’e.

Estasionamentu veikulu iha HNGV, kinta 13/1/2022. imajen TATOLI/ Antonio Dasiparu

Nune’e, Diretór ne’e husu seguransa sira atu halo atendimentu ba ema ho didi’ak liuliu tuir regra ne’ebé estabelese ona.

Iha fatin hanesan, Diretór Ezekutivu HNGV, Alito Soares, hateten, ospitál sai instituisaun nasionál ne’ebé presiza fó fornesimentu ospitál nian ho kualidade no efikásia inklui efisiénsia atu sai sentru kualidade exelente ba atendendimentu saúde públika.

“Ita iha ona estasionamentu, ita mak uma na’in tenke kumpre regra hodi hadi’a  di’ak liután parajen ida ne’e  tanba iha parajen ida ne’e iha grupu haat A B C no D, nune’e publiku bele la’o tuir ida ne’e ho diak ,” Diretór Ezekutivu HNGV ne’e enkoraja.

HNGV hanesan sentru úniku iha Timor-Leste ne’ebé simu pasiente hosi sentru saúde sira ospitál referál lima iha munsípiu ne’ebé transporte para la tuir regra kódigu estrada  fó impaktu ba movimentu  ambulánsia  tama no sai hosi banku emerjénsia.

Regulamentu estesionamentu

Ho razaun sira ne’e, Konsellu Diretivu HNGV deside hodi hasai karta sirkulár ho ninia regulamentu hanesan, regra jerál, kompetensia pesoál seguransa HNGV no parajen iha banku emerjénsia no seluk tan.

Movimentasaun komunidade sira iha areador Emergensia HNGV, kinta 13/1/2022.imajen TATOLI/Antonio Dasiparu

Sirkulasaun jerál iha HNGV sei tuir regra hanesan, velosidade tenke moderada  no labele liu 20km/h, sirkulasaun no para karreta inklui motór tenke tuir regra kódigu estrada, orientasaun husi seguransa obriga ema hotu tenke halo tuir, labele para karreta ka motór iha fatin ne’ebé la autoriza, ikus-liu labele prátika asaun ne’ebé sei difikulta sirkulasaun karreta ka motór.

“Ita nia regra sira ne’e inklui regra parajen sira sei implementa hahú iha loron 7 fevereiru tinan ne’e,” nia akresenta.

Notísia Relevante: HNGV laiha espasu sufisiente simu pasiente

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here