iklan

HEADLINE, SAÚDE

Estoke aimoruk iha armazein SAMES hahú menus

Estoke aimoruk iha armazein SAMES hahú menus

Diretór Ezekutivu Servisu Autonomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony

DILI,13 janeiru 2022 (TATOLI)—Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, hateten estoke nasionál aimoruk hahú menus no ba reajente dengue test kit nia estoke mamuk ona, maibé daudaun ró hahú transporta hela no sei to’o iha Timor-Leste, iha fulan-fevereiru.

“Agora daudaun ita-nia reajente dengue test kit, fomigasaun no abate mamuk iha SAMES no tuir informasaun ne’ebé  ami simu katak Laboratóriu Nasionál Saúde mós mamuk ona entaun ami sente preokupa loos, maibé   tempu badak (Fevereiru) aimoruk sira ne’e sei to’o,” Diretór Ezekutivu SAMES hateten ba jornalista sira iha nia knaar fatin, kinta ohin.

Nia dehan, produtu ka aimoruk sira ne’e posesu transportasaun liuhosi ró mak kleur oituan, maibé sé karik transporte aéreu mak semo regular karik   bele resolve ho lalais.

“Iha rai laran, ami kontaktu hotu ona farmasia sira, maibé sira laiha, ne’ebé ita ajudika ona kontratu ida  ho kompañia Stanford medical  atu supplay hosi Koreia Súl, nune’e produtu hirak iha ona Singapura sei to’o iha fevereiru,” nia afirma.

Nune’e, SAMES sosa dengue test kit   hamutuk 10.000 ho orsamentu $41.500.

Estoke aimoruk iha armazein SAMES iha de’it item 330, hosi númeru ne’e item 243 ho 74% mak mak disponivel no estoke mamuk mak item 87 ho 26%.

“Tanba ne’e, ita halo hela esforsu oinsá mak bele halo substituisaun hosi kategoria sira ne’e, ha’u hanoin iha aimoruk sira ne’ebé mak ita bolu dehan vitál, nesesáriu no esensiál. Agora vitál ne’e loloos estoke labele mamuk, ne’ebé aimoruk vitál ne’e ita iha item hamutuk 92, hosi númeru ne’e item 82 ho 89% mak disponivél no estoke mamuk mak item 10 ho 11%,” nia afirma.

Alende ne’e, aimoruk esensiál item hamutuk 88, hosi númeru ne’e item 70 ka 80% mak disponivel no estoke out ka mamuk item 18 ka 20%. Enkuantu aimoruk nesesáriu iha item 22, kompostu hosi item 11 ho 50% mak disponivél no estoke mamuk 11 item ka 50%.

Notísia Relevante: Fevereiru, Empreza hahú importa aimoruk kímiku fomigasaun no abate

Jornalista : Felicidade Ximenes

Editór: Florencio Miranda Ximenes

iklan
iklan

Leave a Reply

iklan
error: Content is protected !!