Administradór munisípiu Viqueque, Januário Soares ‘Bolly’. Imajen TATOLI/ Vitorino Lopes da Costa

DILI, 13 janeiru 2022 (TATOLI)—Administradór munisípiu Viqueque, Januário Soares ‘Bolly’, hateten, presiza halo fila konservasaun ai-kameli iha munisípiu Viqueque.

“Ita presiza halo konservasaun filafali ba ai-kameli, tanba ai-kameli iha Viqueque desde tempu koloniál portugés, maibé bainhira okupasaun indonézia sira foti hotu. Tanba ne’e, maka agora daudaun ai-kameli iha Viqueque laiha,” Autoridade munisipál hateten ba Agência TATOLI, via telefónika, kinta ne’e.

Nia haktuir, iha tinan 1982 militár sira maka lori sai ai-kameli hosi munisípiu Viqueque iha área Beaço-Maluru, postu administrativu Viqueque villa tanba momentu ne’ebá fábrika mina-morin loke, nune’e milítar sira lori ba Dili no balun lori ba Indonézia hodi prodús mina-morin, to’o tinan 1999 maka para.

Notísia relevante: MAP kuda ai-kameli iha rai ektare 300 hosi tinan 2005-2021

Hafoin akupasaun sira sai hosi Timór maka ai-kameli oan foin moris no komunidade Viqueque kuda filafali iha sira-nia kintál.

“Tuir informasaun ne’ebé ha’u hetan hosi komunidade Beaço katak agora sira kuda fali ai-kameli oan 1.000 no mós iha Buanurak parte Futudu nian komunidade kuda iha rai ektare rua ne’ebé agora komesa boot ona,” nia tenik.

Nune’e, iha ámbitu komemorasaun loron nasionál ai-kameli no floresta iha loron 13 janeiru, Ministériu Agrikultura no Peska (MAP) koordena ho xefe suku sira, atu komunidade ne’ebé hakarak kuda ai-kameli bele foti nia oan iha sentru estabelesimentu viveiru sira iha Viqueque.

“Konserva ai-kameli, ha’u sei koordena ho administradór postu lima no xefe suku sira hodi partilla ba komunidade ne’ebé hakarak kuda ai-kameli,” Administradór hato’o.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here