Prezidente ANPM, Florentino Mateus Soares Ferreira. Imajen TATOLI/Egas Cristóvão

DILI, 13 janeiru 2022 (TATOLI) – Autoridade Nasionál Petróleu no Mineirál, Institutu Públiku (ANPM, IP), kinta ne’e sensibiliza Lei númeru 12/2021 kona-ba Kódigu Mineiru ba entidade sira iha Rejiaun Administrativa Espesiál Oé-Cusse Ambeno (RAEOA).

Prezidente ANPM, IP, Florentino Soares Ferreira, informa, objetivu hosi sensibilizasaun kódigu mineiru ne’e atu esplora rikusoin rai -aran nian, tanba dezde Timor-Leste ukun-an tinan-20 liu, konsentra de’it iha iha rikusoin tasi hanesan mina no gás.

Nune’e liuhosi ANPM, presiza dezenvolve mós rekursu sira seluk iha rai-maran hanesan osan-mean, osan-mutin, platinum, rikusoin ba materiál konstrusaun hodi kontribui ba dezenvolvimentu ekonomia rai laran.

“Lei ida-ne’e importante tebes ba ita-nia rai, tanba lei ne’e fasilita komunidade sira hatene atu bele esplora, no foti hodi transforma rikusoin rai-maran sira-ne’ebé iha, sira-ne’e mak ita konsidera hanesan ita-nia rikusoin mineiráL nian, hodi nune’e bele kontribui ba dezenvolvimentu ekonómiku no sustenta reseita Estadu nian,” Prezidente ANPM, IP, Florentino Soares Ferreira, ko’alia iha salaun Alfándega, Palaban, Oé-Cusse.

Iha sensibilizasaun ne’e, parte ANPM apela ba autoridade sira, jestór sub-rejiaun sira inklui lideransa autoridade lokál sira, nune’e bele serbisu hamutuk hametin liña koordenasaun, hodi eskolla rikusoin saida de’it mak eziste iha RAEOA hodi dezenvolve ba interese nasionál.

Prezidente Autoridade RAEOA, Arsénio Paixão Bano, apresia ba lei mineiru ne’e hodi hahú sensibiliza ba povu, tanba kódigu ne’e aprova iha Parlamentu Nasionál hodi dezenvolve rikusoin iha territóriu nasionál.

“Ha’u agradese tanba ne’e kompeténsia Autoridade RAEOA, atu koordena oinsá realiza polítika ba lei ne’e iha rikusoin balu, ne’e responsavél Governu Sentrál mak administra, ita koopera no koordena maibé objetivu ida de’it, esplora ita-nia rikusoin ne’e ba interese povu ba dezenvolvimentu iha rai ne’e,” nia orgullu.

Notísia relevante: PN aprova projetu-lei kódigu mineiru ho unanimidade  

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here