Eskola EBC 10 Dezembru, Comoro. Imajen TATOLI/Tomé Amado

DILI, 13 janeiru 2022 (TATOLI)–Diretór Eskola Ensinu Báziku Sentrál (EBC, sigla portugés) 10 Dezembru Comoro, Calisto Guterres, relata, daudaun ne’e abitante 52 kontinua okupa resintu eskola.

“Bainhira ita ko’lia kona-ba imajen eskola, ita haree ladún furak, tanba Eskola 10 Dezembru nu’udar eskola públiku ho paraderu besik iha dalan protokolu. Tanba ne’e, atu hetan imajen eskola ne’ebé di’ak, tenke halo lalais ona prosesu dezlokasaun abitante sira ba fatin seluk atu labele okupa tan iha fasilidade no resintu eskola,” Diretór Eskola hateten iha ninia knaar fatin, Comoro, kinta ne’e.

Maski nune’e, dadus ema ne’ebé okupa resintu eskola aprezenta ona ba Ministériu Edukasaun Juventude no Desportu (MEJD) maibé to’o agora seidauk iha asaun ruma hosi Governu.

“Ita hakarak área eskola ne’e alunu sira maka uza, atu nune’e bele identifika paradeiru alunu sira-nia iha eskola, maibé ho prezensa abitante iha eskola ne’e difísil atu identifika alunu, profesór no abitante. Uluk ami hato’o ona katak se bele halo identifikasaun lalais ba abitante atu dezloka ba fatin foun, nune’e eskola totalmente ba alunu de’it hodi sira bele hala’o atividade ho di’ak,” nia akresenta.

Notísia relevante: Uma-kain haat kontinua okupa eskola 04 setembru UNAMET

Diretór haktuir, iha tinan 2017 parte eskola konsege ko’alia ho abitante okupa fasilidade no resintu eskola.

“Sira prontu sai, naran katak Governu haree hela fatin ruma atubele hela hodi kontinua sira-nia atividade negósiu hanesan baibain. Maibé fatin agora ne’ebé sira hela hanesan provizóriu de’it, tanba ne’e la loos atu hadau ka hela permanente,” nia tenik.

Daudaun ne’e iha sala rua maka abitante sira okupa, ne’ebé sala ida okupa hosi profesór ida ho ninia família na’in-11 no sala seluk abitante hosi li’ur mak okupa.

“Sira ne’ebé hela iha resintu eskola maioria profesór ensinu báziku no ensinu sekundáriu 10 Dezembru maka okupa. Ne’e duni parte eskola hein nafatin seriedade Governu atu trata asuntu ne’e hodi labele prejudika filafali atividade eskola,” nia dehan.

Ba kestaun ne’e, Agência TATOLI tenta entrevista abitante ne’ebé okupa iha resintu eskola inklui parte MEJD maibé seidauk konsege ho razaun okupadu.

Jornalista : Tomé Amado

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here