Logo Sekretaria Estadu Juventude no Desportu (SEJD)

DILI, 12 janeiru 2022 (TATOLI)– Governu liuhosi Sekretária Estadu Juventude no Desportu (SEJD) atribui sertifikadu apresiasaun no prémiu ho osan $5.000 ba manán-na’in ne’ebé dezeña uniforme ba atleta modalidade hotu, atu utuliza bainhira partisipa eventu internasionál.

“Ita atribui prémiu ba manán-na’in rua ne’ebé sai vensedór ba kompetisaun dezeñu uniforme ba modalidade hotu iha Timor-Leste, atu utuliza banhira partisipa iha jogu internasionál hodi hatudu identidade Timor-Leste nian,” Xefe Departamentu Desportu Alta Rendimentu SEJD, Marcos da Costa, hateten ba Agência TATOLI iha edifísiu SEJD-Lecidere, kuarta ne’e.

Prémiu ho osan $5.000 ne’e, ba manán-na’in dahuluk atribui osan $3.000 no manám-nain daruak hetan $2.000.

“Uniforme ne’ebé dezeña ne’e, ida de’it, maibé sei vale ba atleta hosi modalidade hotu. Daudaun dezeñu iha ona SEJD atu ba oin sei halo prosesu hodi atu prodús atubele distribui ba modalidade hotu iha territóriu nasionál,” nia akresenta.

Iha  biban hanesan, manán-na’in primeiru lugar, Adilson Bonifacio da Costa, sente kontente no orgullu tanba bele sai primeiru lugar iha eventu ne’e.

“Ha’u nia obra sei prodús sai uniforme atu modalidade hotu utuliza bainhira reprezenta Timor-Leste ba estranjeiru. Iha dezeñu uniforme ne’e ha’u utiliza de’it identidade Timor -Leste nian hanesan Bandeira RDTL no balun hosi ita nia kultura,” nia orgullu.

Entertantu, maná-na’in daruak, Jorginho dos Santos, mós sente kontente tanba SEJD loke oportunidade hirak ne’e fó espasu ba joven-sira bele dezenvolve talentu liuliu iha arte ka dezeñu.

“Ha’u apresia no kontente tanba SEJD iha inisiativa ne’ebé mak di’ak, fó ezemplu mós ba instituisaun Governu hotu bele banati tuir ezemplu hanesan ne’e atu fó oportunidade ba joven sira,” nia relata.

Dezeñu ba uniforme ne’e hamutuk pár tolu homeway rua no netrál ida no dezeñu ne’e utiliza photoshop no entrega de’it file ba SEJD.

Prosesu ba kompetisaun ne’e loke hosi SEJD iha loron 06 to’o 23 novembru 2021, ne’ebé ema-na’in-27 mak compete, maibé  ema na’in rua de’it mak tama sai vensedór.

Iha eventu ne’e, juri halo selesaun ba dezeñu sira ekipa hosi SEJD, Komite Olimpíku Nasionál Timor-Leste (CONTL-sigla portugés), Komite Pra-olímpiku Nasionál Timor-Leste (CPNTL-sigla portugés) no modalidade balun.

Totál orsamentu ba eventu ne’e ho montante $7.000, ne’ebé fahe ba manán-nain rua ho montante $5.000 no gasta ba eventu ne’e hamutuk $1.000 no restu fila ba kofre Estadu.

Notísia Relevante: Alteta timór-oan hosi modalidade hitu prepara kompete iha Sea Games

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here