RAEOA-Repúblika Cuba hametin relasaun investe iha setór saúde. Imajen mídia ZEESM.

DILI, 12 janeiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) ho Embaxadór Repúblika Cuba, kuarta ne’e realiza enkontru ofisiál hametin relasaun biliterál hodi investe iha setór saúde.

Prezidente Autoridade RAEOA, Arsénio Paixão Bano, informa, objetivu hosi enkontru ne’e atu hametin koperasaun entre RAEOA no Cuba, tanba iha mandatu Prezidente Autoridade anteriór Mari Alkatiri, selebra ona akordu ida hodi kontinua investe iha rekursu umanu ba setór saúde iha RAEOA.

Nunne’e parte autoridade halo ona diskusaun ho Ministériu Finansa no Ministra Saúde iha tinan kotuk, kona-ba investimentu iha setór Saúde inklui Organizasaun Mundiál Saúde (OMS) atu apoia iha RAEOA, tanba tuir kompromisu autoridade RAEOA katak, Hospitl Referál Oé-Cusse tenke sai alternativa hanesan tratamenutu espesiál.

“Ita husu ba embaixadÓr atu hametin liña kooperasaun ne’ebé antes ne’e ita halo ona ho Cuba, hodi kontinua apoiu téknika ba área hotu-hotu inklui ekipamentu ba área saúde nian iha Oé-Cusse, tanba daudaun ne’e RAEOA hahú konstrui ona fasilidade saúde hanesan armajenamentu, izolamentu, sala Unidade Kuidadu Intensivu, banku de sangue inklui izolamentu hodi garante atendimentu saúde iha RAEOA,” Arsénio Paixão Bano, informa ba Agência Tatoli, liuhosi telefónika.

Ezekutivu ne’e fó-sai katak, iha sorumutu ne’e Embaixador RepÚblika Cuba, José Ernesto Dias, apresia no otimista, importante tebes atu hametin relasaun iha koperasaun ne’e hodi apoia ba área ne’ebé REAOA presiza.

Tanba tuir dadús ne’ebé Repúblika Cuba rejista rekursu umanu mai iha Timor-Leste ba setór saúde hamutuk ema na’in-1503, nune’e ho kooperasaun ne’e sei iha posibilidade atu apoia RAEOA ba área saida de’it, inklui ekipamentu teknolojia saúde nian.

Entretantu, tuir dadús hosi Sekretáriu Rejionál ba Asuntu Saúde, Manuel da Costa, fó-sai katak, daudaun ne’e ekipa Cuba ne’ebé hala’o serbisu iha Hospitál Referál Oé-Cusse hamutuk ema na’in-11 hodi destaka iha espesialidade haat, maka hanesan ekipa ida destaka iha konsulta labarik pediátria.

Nune’e mós ekipa ida konsulta ba inan isin-rua ne’ebé partu, ekipa ida destaka iha serbisu tékniku laboratóriu no ekipa ida médiku jerál.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here