Diálogu komunitáriu iha jináziu munisipál Maliana, munisípiu Bobonaro, kuarta (12/01). Imajen TATOLI/Jogerjo Guterres

BOBONARO, 12 janeiru 2022 (TATOLI)—Primeiru-Ministru (PM), Taur Matan Ruak, hateten, Governu planeia estabelese polu dezenvolvimentu iha munisípiu Bobonaro no Baucau, ne’ebé daudaun iha hela faze estudu.

“Ami daudaun ne’e halo estudu ba polu dezenvolvimentu iha fatin rua ba dezenvolvimentu naruk, iha munisípiu Baucau sei sai sentru dezenvolvimentu ba munisípiu Baucau, Lautém no Viqueque no ida mak Bobonaro,” Xefe Governu informa durante hala’o diálogu komunitáriu, iha zinájiu munisipál Maliana, munisípiu Bobonaro, kuarta ne’e.

Notísia relevante: MOP divulga informasaun planu dezenvolvimentu urbanu sustentável

Nune’e, Governu deside estabelese futuru polu dezenvolvimentu iha postu administrativu Batugade, munisípiu Bobonaro.

“Batugade sei sai interpostu komersiál ho Indonézia no sidade antiga Maliana ba zona produsaun no sidade foun mak iha tasi ibun área Batugade,” nia akresenta.

Governu hakarak kria polu dezenvolvimentu atu sai interpostu ida, nune’e hirak ne’ebé mai hosi Indonézia bele konsetra iha área ne’e molok liubá munisípiu.

“Daudaun ne’e iha hela prosesu estudu, espera bele ramata no ita hotu bele hatene iha estudu ne’e hateten saida, potensialidade saida, dezafiu, frakeza iha ne’ebé, bainhira mak halo, no kustu ba planu ne’e,” nia dehan.

Biban ne’e, PM bolu atensaun ba komunidade Bobonaro atu labele sosa hotu rai iha área dezenvolvimentu.

“Husu Administradór atu asegura rai Estadu sira iha Batugade, se lae bainhira funsionáriu no emprezáriu sira halai uluk ba sosa tiha rai ne’e mak Estadu tama fa’an fali ba Estadu hodi buka lukru fali,” PM apela.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here