Inan-Aman sira tuur hein hela oan sira iha sala emergensia HNGV, ne'ebe hetan moras dengue, kuarta 5/1/2022.Imajen Tatoli/Antonio Dasiparu

DILI, 12 janeiru 2022 (TATOLI)—Diresaun Nasionál Saúde Públika, liuhusi Departamentu Vizilámsia Epidemolójia iha Ministériu Saúde, relata, kuarta ne’e, kazu dengue iha meadu janeiru ne’e, aumenta ba 344, óbitu na’in-lima, kazu hirak maihosi  munisípiu 10.

“Situasaun kazu dengue Iha Timor Leste, ohin, loron 12 janeiru 2022 númeru dengue sa’e ba 344 no kumulativu mate na’in lima. Iha posibilidade kazu sei aumenta iha semana hirak tuir mai no iha fulan oin mai,” refere nota ne’ebé Agência TATOLI asesu, kinta ne’e.

Notísia relevante: Dengue hamate labarik na’in-haat iha Ermera 

 Maioria kazu ne’e deteta hosi Munisípiu Dili ho totál kazu 272, Manatuto ho kazu 20, Covalima ho kazu 15, Ermera ho kazu 13, Manufahi ho kazu 13, Viqueque kazu haat, Ainaro ho kazu tolu, Liquiça kazu rua, Aileu no Bobonaro relata kazu ida.

Munisípiu Dili nafatin rejistu kazu ne’ebé a’as iha primeira semana to’o terseira semana, fulan janeiru 2022 ho totál kazu 272 no haree ba kada loron kazu aumenta bebeik hosi Munisípiu Dili.

Iha Posto Administrativu Dom Aleixo relata kazu a’as liuhosi postu administrativu hotu ho totál kazu 113, iha primeira semana to’o terceira semana, hafoin tuir hosi posto Cristu Rei ho kazu 58 no Vera-Cruz kazu 51.

Kazu óbito hosi tinan 2020 ho totál 10, iha tinan 2021 ho totál 11, no iha primeira semana fulan janeiro 2022 iha ona óbitu na’in-ida ne’ebé relata hosi Munisípiu Dili, no iha terseira semana relata kazu obitu na’in haat, hosi Ermera. Nune’e, totál Case Fatality Rate nivel nasional ho 1,5%.

Tuir kalendáriu epidemiolojia tinan 2022, iha primeira semana fulan ne’e, Dili relata totál kazu 38 no iha semana Segundo iha kazu 160 no terseira semana iha kazu 74.

To’o ohin loron, fasilidade saúde iha munisípiu Dili hanesan HOSPITÁL Nasionál Guido Valadares (HNGV) rejista ona kazu dengue hamutuk 59, klínika Fatumeta 46, Sentru Saúde Comoro 37, Vera Kruz 40, Bairru Formoza 47, Sentru Saúde Becora 37,  Sentru Saúde Metinaro haat, no  klínika Bairru-pité na’in-ida.

Apela ba populasaun

Nune’e, Ministériu Saúde apela ba populasaun iha Dili laran no mós iha Munisipiu sira seluk, atu aprezenta-an iha fasilidadepúbliku saúde (Sentru Saúde ka Ospitál) ne’ebé besik, bainhira sente isin-manas, ka sente-laran sa’e,liman ain no sikun moras hodi bele hetan atendimentu hosi profisionál saúde sira.

Apela mós ba populasaun iha Dili laran no mós iha Munisipiu sira seluk atu koopera ho autoridade munisípiu no lokál atubele halo limpeza jerál iha suku no bairru laran, fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho diak iha ita nia uma laran, uza ropa ne’ebé liman naruk,  karik toba iha tempu loron, uza ai-moruk hanesan repelente ka autan, uza moskatéiru karik toba iha tempu loron no  soe lixu iha nia fatin.

Notísia Relevante: Fevereiru, Empreza hahú importa aimoruk kímiku fomigasaun no abate

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here