Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 12 janeiru (TATOLI) – Membru Polísia Nasionál Timor-Leste (PNTL) Munisípiu Bobonaro, la sufisiente atu koloka ba estasaun votu hamutuk 150 iha munisípiu refere hodi asegura eleisaun prezidensiál 2022.

Komandante Polísia Nasionál Timor-Leste (PNTL), komandu munisípiu Bobonaro, Superintendente Antoninho Mauluta, hateten, membru efetivu la sufisiente atu koloka iha estasaun votu 150 ne’ebé establese iha postu administrativu neen hanesan Bobonaro, Maliana, Atabae, Cailaco, Lolotoe no Balibo.

Tuir dadus totál membru efetivu iha komandu munisípiu no eskuadra sira iha postu administrativu neen hamutuk 148, maibé hosi numeru ne’e balu sofre moras stroke no balu halo hela tratamentu ba moras seluk, falta de’it 135 mak ativu.

Tuir dadus ne’ebé Sekretariadu Tékniku Administrasaun Eleitorál (STAE) Munisípiu Bobonaro rejista iha tinan 2021 sentru votasaun iha postu administrativu neen hamutuk 130 no estasaun votu hamutuk 150 ho nune’e membru sira labele destaka hotu ba fatin sira-ne’e.

“Ami halo ona enkontru preparasaun ba seguransa kona-ba eleisaun prezidensiál nian ho komandante eskuadra sira hotu, ho komandante postu Batugade. Iha inkontru ne’e ami-nia preokupasaun mak rekursu umanu no transporte, maibe ami sei aprezenta ba komandu jerál atu distribui tán forsa apoia ami,” nia informa ba Agência TATOLI liuhosi telefónika, tersa ne’e.

Maske hasoru difikuldade hirak-ne’e, maibé komandu polísia munisípiu Bobonaro nafatin preparadu asegura materiál sensitivu iha eleisaun prezidensiál ne’ebé sei akontese iha tinan ida-ne’e.

Nune’e mós komandu iha ona planu orienta ekipa ida tún ba terrenu atu identifika sentru votasaun no estasaun votu hirak mak la asesu eletrisidade, estrada, liña internete no identifika fatin balu ne’ebé labele asesu rádiu komunikasaun atubele enkaixa iha relatóriu hodi aprezenta ba komandu jerál.

“Ami-nia planu sira-ne’e komandu jerál mak foti desizaun, atubele distribui tán forsa mai tán ka apoia tán transporte mai ami no hein desizaun hosi komandu,” Superintendente ne’e hateten.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here