Diálogu komunitáriu iha jináziu munisipál Maliana, munisípiu Bobonaro, kuarta (12/01). Imajen TATOLI/Jogerjo Guterres

BOBONARO, 12 janeiru 2022 (TATOLI)–Governu liuhosi Ministériu Agrikultura no Peska (MAP) husu komunidade munisípiu Bobonaro kolabora atu dezenvolve área kultiva sira.

“Irrigasaun daudaun ninia prosesu iha Konsellu Administrasaun Fundu Infraestrutura (KAFI), importante mak imi presiza bee karik ami bele atende bee, atu nune’e bele halai natar, tanba Governu prevee ona osan millaun $80 atu sosa produtu lokál tanba Maliana iha área produtividade boot no potensiál tebes tanba ne’e husu atu ita hotu kolabora malu atu nune’e área kultivu sira ne’ebé iha ita tenki dezenvolve hotu kedas hanesan iha Koelima, Bilimau, Cailaco no Atabae,” Ministru Agrikultura no Peska, Pedro dos Reis, hateten iha ámbitu diálogu komunitáriu iha Jinájiu munisipál Maliana, kuarta ne’e.

Notísia relevante: Autoridade Bobonaro fahe informasaun programa implementa iha tinan 2021

Governu tenta atu mobiliza hodi halo atendimentu ba povu agrikultór, ne’ebé bainhira komunidade presiza autoridade lokál sira ne’ebé besik liu komunidade bele buka maneira ajuda hasa’e produtividade hodi bele hamenus importasaun.

“Kona-ba irrigasaun Maliana II, prosesu konstrusaun la’o hela, espera katak tempu besik bele ramata. Fatin balun mak kotu maibé ami komunika ona emprezáriu balun atu halo hela konstrusaun gratuitamente, no mós irrigasaun Cailaco, maibé ekipamentu la sufisiente nune’e bainhira ramata bele atende iha fatin seluk hotu atu mobiliza fali ba,” nia akresenta.

Ligadu ho pedidu ne’e, Administradór postu Cailaco, Alfredo Meta Dau, hateten, daudaun ne’e irrigasaun atu fornese bee ba natar iha postu ne’e a’at.

“Kona-ba irrigasaun, bee dalan atu fornese bee ba natar ektare 1.500 a’at hotu, tanba dezastre naturál no mota Bolobu agora halo fali dalan ba natar,” nia tenik.

Enkuantu, komunidade iha Kailelo, natar besik ektare 100-resin maibé bee mota tama fali ba natar laran.

“Husu ba Governu atubele halo intervensaun, tanba ne’e populasaun suku ida tomak nia natar ne’ebé prodús hare hodi ba konsume loron-loron nian, tanba ne’e kuandu la rezolve maka sira sei hamlaha iha tinan oin,” Autoridade postu ne’e preokupa.

Aleinde ne’e, Autoridade husu MAP atu halo reabilitasaun ba sistema irrigasaun Loes, Atabae ho distánsia kilómetru 8, konstrusaun ba morru protesaun natar Leolima, suku Atabae no natar Boloi pertense ba suku Atás.

“Husu apoia tratór no hand tratór ba komunidade agrukultór sira iha postu administratu Atabae, konstrusaun morru protesaun ba sentru agrikultura no reabilita edifísiu agrikultór Atabae,” nia dehan.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here