Vise Primeiru-Ministru no Ministru Planu no Ordenamentu (MPO), José Maria dos Reis, prezide reuniaun Konsellu Ministru, iha Palásiu Governu, kuarta (12/01). Imajen TATOLI/Francisco Sony

DILI, 12 janeiru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova rezolusaun hodi rekondús mandatu Arcanjo da Silva nu’udar Diretór Ezekutivu Ajénsia Promosaun Investimentu no Exportasaun  (TradeInvest) Timor-Leste.

“Ohin Konsellu Ministru aprova Rezolusaun Governu hodi nomea filafali Arcanjo da Silva sai Diretór Ezekutivu TradeInvest,” Ministru Prezidénsia Konsellu Ministru, Fidelis Manuel Leite Mangalhães, relata hafoin reuniaun ezekutivu iha Palásiu Governu.

Projetu Rezolusaun ne’e aprezenta hosi Ministru Koordenadór Asuntu Ekonómiku (MKAE), Joaquim Amaral, ba mandatu tinan tolu.

Antes ne’e, iha loron 27 maiu 2020, KM aprova Projetu Rezolusaun Governu, hodi renova mandatu Arcanjo da Silva nu’udar Diretór Ezekutivu TradeInvest Timor-Leste.

TradeInvest Timor-Leste nia papél atu promove, koordena, fasilita no akompaña investimentu externu no exportasaun, hanesan konsentraliza prosedimentu admnistrativu ba autorizasaun no rejistu investimentu externu ne’ebé enkuadra iha rejime direitu, insentivus no benefísiu ne’ebé previstu iha Lei Investimentu Externu.

Desde estabelese iha tinan 2006, ajénsia ne’e konsege atribui sertifikadu investidór hamutuk 203 no akordu espesiál kuaze 10, ne’ebé sei iha tan proposta barak ne’ebé presiza tetu.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here