Sekretáriu Rejionál ba Asuntu Agrikultura, José Eta. Imajen Agência TATOLI/Abílio Elo Nini.

DILI, 12 janeiru 2022 (TATOLI) – Sekretáriu Rejionál ba Asuntu Agrikultura, Rejiaun Administrativa Espesiál Oé-Cusse Ambeno (RAEOA), José Eta, informa daudaun ne’e diresaun agrikultura ajenda ona planu prioridade haat ho sub-atividade hamutuk 78 iha ezekusaun planu asaun anuál tinan fiskál 2022.

“Iha tinan ne’e ita sei implementa programa prinsipál haat, boa govenasaun, servisu agrikultura nian, floresta ba konservasaun, hasa’e produsaun alimentár, produsaun animál ba pekuária no peska no jestaun ba irrigasaun bee nian, ho nia sub-atividade ba agrikultura nian hamutuk 78,” José Eta, informa ba Agência Tatoli, liuhosi telefónika, kuarta ne’e.

Nia esplika, programa prioridade ba área floresta maka’as atu halo jestaun rekursu naturál, foka ba área protejida sira iha sub-rejiaun haat, inklui aumenta halo levantamentu dadus nune’e no kontinua halo konservasaun ba bee-matan sira.

Nune’e mós utiliza funsionamentu sentru viveru sira-ne’ebé estabelese ona iha kada sub-rejiaun tanba tinan ne’e sei distribui ekipamentu ba fatin sira-ne’e.

Nia fó-sai katak, sentru viveru ne’ebé autoridade RAEOA harii ona iha 2021 maka hanesan, iha sub-rejiaun Nítibe lokaliza iha suku Lela-Ufe, sub-rejiaun Oésilo lokaliza iha suku Bobometo, aldeia Tumin, iha Panta Makasar no tuir planu sei estabelese ida iha sub-rejiaun Pássabe.

“Fatin sira-ne’e ita sei destaka viverista sira, nune’e bele responde fasilita téknika servisu hamutuk ho komunidade iha baze ba área floresta nian,” nia fó-sai.

Kona-ba área hasa’e produsaun alimentár, diresaun agrikultura, sei fasilita apoiu ba grupu agrikultór atu produs produtu potesiál sira, hanesan iha sub-rejiaun Nítibe suku Suni-Ufe, sei fó prioridade ba iha produtu páteka no hare metan, iha suku Usitako sei fó prioridade ba produtu koto-mean, forekeli no foremungu, aliende ne’e sei apoiu mós fini.

Nune’e, iha tinan ne’e sei hasa’e fini purifikasaun hare membramo nian iha sub-rejiaun Pante Makasar, perténsia ba natar sira hosi suku Cunha, Lalisuk, Costa no Lifau.

Ba fali sub-rejiaun Oésilo no Pássabe sei dezenvolve produtu batar no hare inklui produtu seluk ne’ebé maka komunidade durante prodús maibé ladún másimu tanba sei uza sistema tradisionál.

Entretantu, programa hirak-ne’e prevee ona orsamentu hamutuk $1,045.493 ba preparasaun ezekusaun planu asaun 2022 nian.

Progresu 2021

Iha tinan 2021 Sekretaria Rejionál ba Asuntu Agrikultura, kosege ezekuta orsamentu kuaze 70% hosi OJE 2021, hodi finansia programa hasa’e produsaun alimentár, liuliu produtividade hare nian no rekupera estragu ambientál.

Programa food for work ba konservasaun bee-matan iha sub-rejiaun haat hamutuk bee-matan 85 ho totál área konservasaun hamutuk ektare 100,80, inklui projetu rekonstrusaun gabiaun unidade 15.

Jornalista         : Abílio Elo Nini
Editór               : Evaris Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here