Diretór Downstream Unidade Timor GAP, E.P, Francelino Boavida, asina akordu kooperasaun ho Diretór Sentru Formasaun Tibar, Simão Tito Bareto, iha salaun Timor GAP, Timor-Plaza CBD 1, tersa (11/01). Imajen TATOLI/Francisco Sony

DILI, 11 janeiru 2022 (TATOLI)–Timor Gás no Petróleu, Empreza Públika (Timor GAP, E.P) hamutuk ho Sentru Nasionál Empregu no Formasaun  Profissionál (CNEFP, sigla portugés), tersa ne’e, selebra akordu ba kontinuasaun formasaun tékniku profisionál iha área manutensaun no instalasaun ba joven hamutuk na’in-20 hosi suku Maluru-Beaço, postu administrativu Viqueque villa, munisípiu Viqueque.

Nune’e, formasaun iha área tolu hanesan báziku eletrifikasaun, soldadura báziku no kursu báziku ba kanalizasaun, sei realiza iha Sentru Formasaun Tibar durante fulan-neen, hahú iha loron 24 janeiru no sei ramata iha juñu no

Diretór Downstream Unidade Timor GAP, E.P, Francelino Boavida. Imajen TATOLI/Francisco Sony

“Kontinuasaun formasaun iha planta Liquefied Natural Gas (LNG) sei envolve direta foin-sa’e hirak ne’e iha on the job training hodi bele aumenta liután koñesimentu no abilidade iha indústria mina no gás inklui planta LNG ne’ebé sei harii iha Beaço, Viqueque,” Diretór Downstream Timor Unidade GAP, E.P, Francisco Boavida, hateten, iha salaun konferénsia Timor GAP, E.P, Timor Plaza, tersa ne’e.

Kontratu ne’ebé asina hosi Diretór  Francisco Boavida no Diretór CNEFP, Simão Tito Barreto, hanesan prova hodi realiza kompromisu hosi Ministériu Petróleu no Minerál (MPM) liuhosi Timor GAP, E.P no CNEFP.

Diretór Downstream Unidade Timor GAP, E.P, Francelino Boavida, asina akordu kooperasaun ho Diretór Sentru Formasaun Tibar, Simão Tito Bareto, iha salaun Timor GAP, Timor-Plaza CBD 1, tersa (11/01). Imajen TATOLI/Francisco Sony

Antes ne’e, formasaun faze dahuluk iha tinan 2019, ba ema hamutuk 33, ne’ebé ikus mai ema na’in-25 mak pasa formasaun dahuluk.

“Maibé prosesu kleur, entaun daudaun hela na’in-20. Timor GAP, E.P inisia planu atu fó kapasitasaun rekursu umanu liuliu ba joven hosi suku Maluru-Beaço, hodi tuir formasaun tékniku profisionál iha sentru formasaun no sei kontinua formasaun iha área espesializadu balun iha PT. Badak LNG, Batang, Indonézia,” nia akresenta.

Tanba impaktu pandemia, planu kontinuasaun formasaun ba joven hirak ne’e labele kontinua iha tinan hirak liubá, maibé hafoin normaliza hikas situasaun mak foin kontinua fali prosesu.

“Tanba ita harii planta ema tenki iha koñesimentu manutensaun no abilidade hodi halo manutensaun planta iha futuru,” nia tenik.

Joven sira ne’ebé atu formasaun sei tuir teste ho valór másimu 70, hafoin tuir tan kursu manutensaun iha Kalimantan, Indonézia.

Orsamentu ba formasaun hamutuk $59.000, ne’ebé aloka ba formasaun no akomodasaun ba formandu.

Diretór Jerál SEFOPE, Paulo Alves. Imajen TATOLI/Francisco Sony

Iha fatin hanesan, Diretór Jerál Sekretaria Estadu Formasaun Polítika no Empregu (SEFOPE), Paulo Alves, espera formandu sira bele tuir formasaun ho di’ak no to’o ramata.

“Ita espera katak joven nain-20 bele tuir formasaun to’o finál. Nune’e, aban bainrua projetu LNG la’o karik ita iha ona rekursu umanu hodi responde ba nesesidade. Tanba ne’e, ha’u husu joven-sira atu aproveita formasaun ne’e to’o ramata,” nia hameno.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here