Sekretáriu Estadu Joventude no Desportu (SEJD), Abrão Saldanha halo lansamentu relatóriu estudu preferénsia juventude iha salaun otél Timor, tersa 11 janeiru 2022. Imajen Tatoli/Antonio Dasiparu

DILI, 11 janeiru 2022 (TATOLI)– Governu liuhosi Sekretária Estadu Juventude no Desportu (SEJD), tersa ne’e, lansa relatóriu peskiza preferénsia juventude ba edukasaun, empregu no partisipasaun sívika ne’ebé hala’o hosi Alume Parlamentu Foinsa’e Timor–Leste (APFTL).

Biban ne’e, SEJD Abrão Saldanha, hateten, inisiativa estudu ne’ebé di’ak hosi Alume APFTL atu buka hatene joven-sira nia hakarak iha eskola nivél formal no naun formál iha territóriu nasionál.

Sekretária Estadu Joventude no Desportu (SEJD), Abrão Saldanha. Imajen Tatoli/Antonio Dasiparu

“Ita haree rezultadu relatóriu hatudu katak maioria labarik hotu iha Timor-Leste iha interese ba eskola no hakarak finaliza sira nia estudu iha nivél lisensiatura no basarelatu,” SEJD ne’e hateten hafoin lansa relatóriu peskiza ne’e iha Hotel-Timor-Dili.

Alende ne’e, rezultadu estudu kona-ba empregu hatudu joven-sira maioria hakarak  hetan empregu formál nian ho nia profisaun hanesan médiku, professór, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Nune’e mós, iha partisipasaun sivíka nian maioria joven sira hakarak partisipa prátika iha desportu no arte.

“Rezultadu peskiza ne’e hanesan evidénsia ida atu Governu no entidade privadu no Agência internasionál sira haree saida mak sira bele dezenvolve hosi ne’e hodi koresponde ho joven-sira nia hakarak,” nia dehan.

Iha biban hanesan, Prezidente APFTL, Zaulino Gomes da Silva, hateten, hala’o estudu ne’e tanba hetan konfiansa hosi SEJD atubele rekolla dadus sira kona-ba juventude ne’ebé ho idade 15 to’o 24 iha Timor-Leste.

Prezidente Alume Parlamentu Foinsa’e Timor-Leste, Zaulino Gomes da Silva.Imajen Tatoli/Antonio Dasiparu

“Estudu ne’e, ita halo kuaze fulan-rua tanba hahú hosi agostu to’o setembru no iha outubru to’o dezembru 2021, ita halo analiza no prodús relatóriu,” nia akresenta.

Fundu ba peskiza ne’e mai hosi SEJD ho montante $30.000, maibé la konsege gasta hotu.

Peskizadór hosi APFTL konsege intervista ka rekolla informasaun hosi autor ka joven hamutuk na’in 2.693 hosi munisípiu 12 no Rejiaun Administrativa Oé-Cusse no Ambeno (RAEOA).

Tanba ne’e,  konkluzaun xave iha relatóriu estudu ne’e mak, nivel edukasaun ne’ebé joven sira ho idade 15 to’o 24 hakarak atinje basarelatu no lisensiatura hamutuk 14,63%, 14,63% ba mestradu no 8,65% ba doutoramentu.

Taxa joven-sira ne’ebé hakotu eskola hamutuk 18,47%, no daudaun ne’e sira balun hateten hakarak fila hikas ba eskola hamutuk 60,24%.

Preferensia ba área estudu ka departementu iha nivél sekúndaria,maioria hakarak ba siénsia teknolójia no naturál hamutuk 50,98% no desportu hanesan atividade estra-kurikuler iha eskola ne’ebé joven sira prefere liu.

Lian-ingles hanesan kursu báziku ne’ebé joven sira hakarak aprende hamutuk 82,46% no ortikultura okupa lista da-huluk iha tipu formasaun vokasionál ne’ebé joven sira prefere liu hamutuk 13,24%.

Situasaun atuál joven sira ho idade 20 ba leten hahú buka ona kampu traballu. Potensia kriasaun auto-empregu joven timoroan sira iha rai laran ladauk forte no ida ne’e hatudu hosi dadus preferensia ba empregu joven nia maioria domina tipu empregu formal uitoan de’it mak hili agrikultura hamutuk 4,98% no negósiu hamutuk 2,23%.

SEJD, Abrão Saldanha halo lansamentu relatóriu peskiza preferénsia juventude iha salaun Hotel Timor, tersa 11 janeiru 2022. Imajen Tatoli/Antonio Dasiparu

Kona-ba desportu liuliu futeból, basketból, voleiból no futsál sai hanesan modalidade desportu ne’ebé komun ba joven sira. Joven sira nia envolvimentu iha empreendedorizmu kiik tebes ho 1,45%, iha arte no kreatividade hamutuk 4,01% no agrikultura hamutuk 4,93%.

Entretantu,tuir dadus sensus  uma-kain 2015 hatudu katak populasaun Timor -Leste ho idade 35 mai kraik hamutuk 75%.

Nune’e, Governu Timor-Leste nia polítika nasionál juventude hatur no fó rekoñese ba joven timór-oan sira nuudar ajente importante no rekursu ne’ebé mak krusiál ba prosesu dezenvolvimentu nasionál.

Refleta ba realidade demográfiku ne’ebé sensus populasaun Timor-Leste 2015 hatudu no rekoñese foinsa’e sira nia importansia,  nune’e VIII Governu konstitusional deside atu aliña polítika públika sira ne’ebé mak ligadu ka relevante ba juventude no ba joven sira nia interese no nesesidade.

Notisia relevante: APFTL hakarak lori joven sira ba atinje objetivu haat

Jornalista: Hortencio Sanchez

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here