Graduadu Fakuldade Agrikultura UNTL partisipa seremónia graduasaun, iha CCD, tersa (11/01). Imajen TATOLI/Francisco Sony

DILI, 11 janeiru 2022 (TATOLI)—Universidade Nasionál Timor-Lorosa’e (UNTL), segunda ne’e, realiza seremónia graduasaun iha parte dadeer, ba finalista 336 hosi fakuldade haat.

Reitór UNTL, João Soares Martins, muda fita ba mellor klasifikasaun Graduasaun UNTL tinan, iha CCD, tersa (11/01). Imajen TATOLI/Francisco Sony

“Ha’u fó hanoin ba alin graduadu sira atu uza matenek ho didi’ak, matenek ida tuir Nai Maromak nia hakarak, la’ós matenek ida tuir mundu nia hakarak, maibé matenek ida ne’ebé atu serví nasaun, komunidade no família,” Reitór UNTL hateten iha ámbitu graduasaun, iha Sentru Konvensaun Dili (CCD, sigla portugés).

Notísia relevante: Seremónia graduasaun UNTL adia ba 11 janeiru 2022

Nune’e, nia husu atu graduadu sira labele aplika matenek hodi bobar malu maibé tenke prontu serví ema seluk.

“Bainhira ita sai matenek hodi bobar ema tun sa’e, Nai Maromak sei la permite. Ita boot sira sai matenek atu buka serví ema seluk tuir dutrina ne’ebé Nai Jesus hanorin hela mai ita,” nia akresenta.

Graduadu Fakuldade Agrikultura UNTL partisipa seremónia graduasaun, iha CCD, tersa (11/01). Imajen TATOLI/Francisco Sony

Reitór konsidera, seremónia graduasaun nu’udar momentu espesiál ne’ebé estudante, inan-aman no universidade selebra susesu, ne’ebé ho esforsu tomak konsege alkansa liuhosi sakrifísiu maka’as.

“Ita-boot sira nia terminasaun ikus iha graduasaun, liuhosi dezafiu oioin ne’ebé hasoru iha tinan barak nia laran,” Reitór dehan.

Seremónia graduasaun UNTL ba loron 11 janeiru 2022, fahe ba parte rua, ne’ebé parte dadeer ba estudante finalista 336 hosi Fakuldade Agrikultura 94, Fakuldade Enjeñaria Siénsia no Teknolojia 93, Fakuldade Medisina no Siénsia Saúde 134, no Fakuldade Ekonomia no jestaun 15.

Enkuantu, parte lorokraik gradua tan estudante finalista 306, hosi Fakuldade Edukasaun Arte no Umanidade na’in-207, Fakuldade Siénsia Sosiál 75, Fakuldade Direitu 15 no Fakuldade Filozofia 9, ho nune’e, totál graduadu hamutuk na’in-642.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here