Kondisaun atuál estrada ligasaun postu administrativu Lolotoe ba kapitál Maliana, kuarta (22/09/12). Imajen Tatoli/Sérgio da Cruz.

DILI, 11 janeiru 2022 (TATOLI)—Representante povu iha uma fukun Parlamentu Nasionàl husu Governu atu normaliza estrada iha territóriu nasionál hosi vila ba postu administrativu sira ne’ebé grave, nune’e belé hamenus risku movimentu transporte públiku atu labele akontese asidente ruma.

“Iha estrada territóriu nasionál, ha’u ko’alia kona-ba estrada iha munisípiu Covalima ne’ebé grave. Estrada ne’ebér liga postu Suai Vila ba Maucatar, Fohorem no Fatumea uluk halo ona alargamentu maibé agora tempu udan tanba baleta laiha no bee suli tuir estrada, nune’e estrada nakfila ba mota,” Deputadu Bankada Fretilin Alexandrino Cardoso hato’o liuhosi plenária iha Parlamentu Nasionàl, tersa ne’e 

Kondisaun estrada sira-ne’e fó risku ba iha populasaun sira halo movimentu hosi munisípiu ba postu, hosi postu ba suku sira ne’ebé bele afeta ba ema-nia vida tanba kondisaun estrada grave.

Deputadu ne’e sujere ba Guvernu, tinan ne’e atu halo normalizasaun ba estrada ne’ebé aat nune’e hamenus risku hodi mosu asidente ba sidadaun sira utiliza estrada públiku.

Deputada Partidu KHUNTO, Olinda Guterres husu Governu liuhusi Ministériu Obra Publika atu prevene orsamentu ba tinan-ne’e, hodi normaliza ka hadi’a estrada sira iha área rurál ne’ebé ninia kondisaun grave.

Deputadu CNRT, Domingos Carvalho sujere ba Governu atu hadi’a estrada iha Liquiça, postu administrativu Maubara tanba rai-monu taka hela estrada to’o agora seidauk halo normalizasaun kuaze fulan ida ona.

“Iha momentu ha’u husu ba komunidade dehan fulan ida resin ona, ita tenke foti iha plenária ne’e hodhusu Governu atu halo normalizasaun,” nia hateten.   

Aleinde ne’e, rai taka estrada Mota Babonu fó ameasa boot ba ponte ida-ne’ebé lokaliza iha suku Vaviquinia, postu administrativu Maubara, munisipiu Liquiça to’o ohin loron seidauk halo normalizasaun. 

Enkuantu Orsamentu Jerál Estadu 2022 ba MOP preve millaun $160 no hosi orsamentu ne’e fahe ba saláriu no vensimentu $3,113,499, bens servisu $26,086,873, kapitál menór $1,046,096, kapitál dezenvolvimentu $23,184,949 no transferénsia públika $107,000,000.

Aleinde ne’e, verba ne’ebé prevee sei finansia programa lima hanesan estrada no ponte $32,873,534, dezenvolvimentu rurál urbana $3,624,246, boa-governasaun no jestaun instituisionál $16,933,637, água no saneamentu $17,000,000 no eletresidade $90,000,000.

Notísia Relevante: PN husu IGE, I.P koloka ekipamentu mellora intervensaun iha tempu udan

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here