Deputada CNRT, Carmelita Caetano Moniz. Imajen/Dok. TATOLI

DILI, 11 janeiru 2022 (TATOLI)—Parlamentu Nasionál (PN) liuhosi eleisaun sekretu iha plenária, hili Deputada Carmelita Caetano Moniz (efetivu) ho Ivo Jorge Valente (suplente) hodi reprezenta Parlamentu Nasionál sai membru Konsellu Superiór Majistratura Judisiál (KSMJ) ba periódu tinan haat.

Deputadu sira iha PN halo votasaun ba pakote rua ho lista A aprezenta hosi bankada CNRT, Deputada Carmelita Caetano Moniz nu’udar membru efetivu ho Ivo Valente membru suplente no lista B aprezenta hosi Bankada Fretilin hanesan Alcino de Araújo Barris membru efetivu no Arlindo Dias Sanches nu’udar suplente.

Maibé liuhosi eleisaun votu sekretu ne’e, rezulatdu votasaun hatudu katak pakote A mak votu barak liu ho votu 40 no pakote B ho de’it votu 24.

“Nune’e kandidatu lista A Carmelita Moniz no Ivo Valente mak manan hodi reprezenta Parlamentu Nasionál nu’udar membru iha Konsellu Superiór Majistratura Judisiál,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi  plenária iha Parlamentu Nasionál, tersa ne’e.

Deputada, Carmelita Caetano Moniz agradese ba deputadu sira-ne’ebé fó ona apoiu másimu tebes no promete sei la hala’o kna’ar ho interese partidária no tau atensaun liu ba interese instituisaun (PN) nian.

“Ha’u espera katak bele hala’o servisu todan ida-ne’e sai nu’udar membru Konsellu Superiór Majistratura Judisiál ko’alia kona-ba agora ita atu tama ba reforsu setór judisiáriu, entaun órgaun konsellu tenke hala’o,” nia hateten.

Hanesan membru konsellu, knaar ne’ebé mak sei hala’o mak atu haree ba juis sira-nia lala’ok tomak hanesan dezempeñu, avaliasaun, inspesaun no kualidade prosesu hodi deside sira-nia karreira.

Tuir Konstituisaun Repúblika Demokrátika Timor-Leste (KRDTL) iha artigu 128 (Konsellu Superiór Majistratura Judisiál nian), ne’ebé haktuir iha alínea 1 hateten, Konsellu Superiór Majistratura Judisiál nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juís sira.

Iha alínea 2 haktuir, Juís Prezidente Tribunál Supremu Justisa nian mak prezide Konsellu Superiór Majistratura Judisiál, ne’ebé halo parte vogál sira tuirmai ne’e:  a) Ida, Prezidente-Repúblika mak hili, b) Ida, Parlamentu Nasionál mak foti, c) Ida, Governu mak hili, d) Ida, Majistradu Judisiál mak hili hosi sira leet.

Alínea 3 hateten, lei maka regula Konsellu Superiór Majistratura Judisiál nia kompeténsia, organizasaun no nia knar.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here