Sunu-lilin fó hanoin ba ema ne'ebé lakon ona vida tanba virus HIV-SIDA, no agradese ba sira ne'ebé luta hasoru HIV-SIDA. Imajen Tatoli/Arminda Fonseca

DILI, 11 janeiru 2022 (TATOLI)— Tuir dadus estatísika Ministériu Saúde, hahú hosi tinan 2003 to’o novembru 2021, rejista pasiente pozitivu HIV-SIDA hamutuk 1,464, hosi numéru ne’e mate na’in-234.

“Ita nia dadus hahú tinan 2003 to’o novembru 2021, rejista ema ho HIV-SIDA na’in-1.464 no mate na’in-234. Ita konsege halo ona tratamentu ba pasiente 719 no na’in-511 lakon hosi tratamentu ne’ebé ami sei buka tuir,” Ofisiál Moras Hadaet hosi Relasaun Seksuál iha Ministériu Saúde, David de Jesus Verdial, hateten bainhira partisipa iha sensibilizasaun informasaun prevensaun HIV-SIDA ba membru Bombeiru iha salaun  Bombeiru-Caicoli, tersa ne’e.

Notísia Relevante: Timoroan 1.256 mak sofre HIV/SIDA, mate 140 

Hosi dadus ne’ebé fó-sai hosi MS ne’e hatudu katak munisípiu Dili mak okupa númeru dahuluk ho kazu HIV-SIDA ho totál 1.056, Bobonaro 103 no munisípiu sira seluk númeru ki’ik-liu.

Nune’e, Governu liuhosi MS prepara fatin ualu atu halo tratamentu ba pasiente HIV-SIDA hanesan Hospitál Nasionál Guido Valadares (HNGV), Ospitál Referál lima iha munisípiu, klínika bairru-pité no Sentru Saúde Vera-Kruz, Sentru Saúde Bobonaro no Baucau.

Tuir nian, sensibilizasaun ne’e importante atu hasa’e konsénsia sidadaun hotu halo prevensaun ba moras hada’et hosi relasaun seksuál ne’e.

Iha biban hanesan, Prezidente Institutu Nasionál Kombate  HIV-SIDA, Atanasio  de Jesus, hateten, sensibilizasaun informasaun ba  membru  Bombeiru sira atu  bele hatene  liu kona-ba moras HIV-SIDA, nune’e halo prevensaun ba sira nia-an.

Instituto Nasionál ne’e iha ona planu asaun nasionál liuhosi meiu sensibilizasaun iha suku no munisípiu sira hodi kombate HIV-SIDA.

“Ema hotu tenke ho asaun ida atu prevene-an hosi moras ida ne’e no husu ba sira ne’ebé mak pozitivu ona labele tauk, maibé nafatin halo tratamentu atu imunidade forte hodi bele moris ho di’ak,” nia enkoraja.

Entertantu, Diretór Nasionál Bombeiru, Cladio Silva, agradese ba   Ministériu Saúde no mós Instituto Nasionál Kombate HIV-SIDA ne’ebé fahe ona informasaun ba ekipa bombeiru atu ema hotu hatene moras ne’e afeta tebes ba ema nia saúde, nune’e tenke halo prevensaun.

“Ami agradese tebes tanba durante ne’e ita foku liuba COVID-19, maibé agora tempu to’o ona para ita tau atensaun ba moras ne’ebé mak afeta ba ita-nia saúde,” Diretór Nasionál ne’e akresenta.

Ekipa bombeiru ne’ebé mak partisipa iha atividade sensibilizasaun ne’e hamutuk 70-resin

Notísia Relevante:  Estrela+ disemina impaktu HIV-AIDS iha Pante Makassar

Jornalista : Felicidade Ximenes

Editór       : Florencio Miranda Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here