Diretór Nasionál Agrikultura no Ortikultura Ministériu Agrikultura no Peska (MAP), Lúcio Romeo Ribeiro. Imajen Tatoli/Natalino Belo.

BAUCAU, 11 dezembru 2021 (TATOLI) – Ministériu Agrikultura no Peska (MAP) sei distribui ai-moruk kanon kombate peste Lakataru ne’ebé ameasa agrikultór sira-nia batar iha munisípiu Baucau.

Diretór Nasionál Agrikultura no Ortikultura iha Ministériu Agrikultura no Peska (MAP), Lúcio Romeo Ribeiro, hateten, estoke ai-moruk daudaun ne’e sufisiente tanba iha tinan 2021 sosa ona hamutuk litru 234.000 ba faze tolu, dahuluk 94.000, daruak 80.000 no 60.000.

“Ha’u bolu ona tékniku sira halo konfirmasaun sobre ai-moruk pestisida hodi responde ba Lakataru ne’ebé atake ai-horis, liuliu batar,” nia informa ba Agência TATOLI iha nia kna’ar-fatin, Comoro, tersa ne’e.

Romeo sei husu ba tékniku sira atu aprezenta lista estoke iha kada munisípiu tuir nesesidade inklui potensialidade kada munisípiu hafoin halo koordenasaun ho diretór servisu munisipál agrikultura sira.

Nia rekoñese Lakataru hahú atake agrikultór sira-nia batar tanba ne’e husu utiliza métodu tradisionál kombate peste ne’e.

Nune’e mós meiu seluk mak buka Lakataru atu hamate direitamente nune’e labele afeta ba batar seluk ne’ebé iha to’os laran.

“Maibé sentifikamente tenke responde ho ai-moruk ne’ebé parte MAP prepara,” Lúcio akresenta.

MAP rasik sosa ai-moruk kímiku pestisida hodi kombate Lakataru hosi Indonézia ho totál orsamentu iha tinan 2021 hamutuk rihun $234 ne’ebé daudaun ne’e iha ona armazein hodi responde tuir nesesidade agrikultór kada munisípiu.

Notísia relevante: Baucau menus ai-moruk kombate Lakataru

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here