Diálogu komunitáriu iha Aeroportu internasionál Komandate Ein Xefe Kayrala Xanana Gusmão, Covalima, tersa (11/12). Imajen TATOLI/Jogerjo Guterres

COVALIMA, 11 janeiru 2022 (TATOLI)—Primeiru-Ministru (PM), Taur Matan Ruak, hamutuk ho membru Governu balun realiza diálogu komunitáriu, tersa ne’e, iha munisípiu Covalima, ne’ebé iha biban ne’e maioria partisipante husu rezolve problema infraestrutura bázika.

Xefe suku Belekasa, Leonito Gusmão, hato’o preukupasaun kona-ba kondisaun estrada liga munisípiu to’o suku, asesu eletrisidade, no bee-moos.

“Suku Belekasa iha aldeia hitu, kompostu hosi populasaun 3.000 hosi família 100-resin, ne’ebé aldeia rua mak seidauk asesu estrada ligasaun munisípiu ba postu no postu mai aldeia. Enkuantu Kona-ba eletrisidade iha aldeia hitu iha suku ne’e no aldeia haat mak seidauk asesu liña eletrisidade. Kona-ba bee-moos, hosi aldeia hitu ne’e iha aldeia rua mak durante ne’e seidauk asesu bee-moos,” Autoridade lokál relata iha Aeroportu internasionál Komandate Ein Xefe Kayrala Xanana Gusmão, Covalima.

Notísia relevante: Governu prepara dezenvolve estrada ligasaun Ainaro bá Bobonaro no Zumalai

Biban hanesan, Xefe suku Bee-lulik leten, postu administrativu Fatumea, Santina José Amaral, kestiona mós ho kondisaun estrada ne’ebé fó impaktu ba movimentasaun komunidade.

“Bainhira tempu udan, ami-nia suku susar tebes no kondisaun estrada lori impaktu boot ba komunidade bainhira utiliza transporte públiku, tanba foin lalais karreta ida monu tama rai kuak, tanba ne’e maka ami husu urjente ba Institutu Jestaun Ekipamentu, Institutu Públiku (IGE, I.P) karik bele tau-atensaun hela ba ami-nia preokupasaun ne’e,” nia akresenta.

Liga ba liña eletrisidade, iha suku Fatumea, iha aldeia balun asesu ona no balun seidauk, maibé povu halerik nafatin tanba kuandu anin no udan oituan de’it ahi mate kuaze semana ida ka rua.

“Tanba ne’e husu ba parte kompetente atu tau netik atensaun ba ami-nia preokupasaun ne’e,” nia akresenta.

Kondisaun estrada implika implementasaun UKL

Nune’e mós, Administradór postu Fohorem, Carlos de Carvalho de Araújo, haktuir, aldeia Lorokidan iha suku Fihorem, benefisia Uma Kbiit Laek (UKL) tolu maibé daudaun ne’e seidauk ramata tanba kondisaun estrada ladi’ak, nune’e difikulta transporta ekipamentu.

“Kona-ba estrada liga hosi munisipiu ba postu to’o suku no aldeia, to’o ohin loron a’at tebes. Aldeia Lorokidan mak hetan oportunidade ba programa Uma Kbiit Laek, maibé to’o agora uma tolu ne’e seidauk hotu tanba transporte atu lori sasán ba to’o fatin ne’e difisil tebes tanba kondisaun estrada a’at, kuandu ida ne’e oinsá mak programa ida ne’e atu susesu,” nia dehan.

Aleinde ne’e, nia preokupa mós tanba tempu badak Timor-Leste sei realiza Eleisaun Prezidensiál, maibé kondisaun estrada sai difikuldade atu hakat ba sentru votasaun sira hodi ezerse direitu. Tanba ne’e, nia parte husu autoridade lompetente atu tau atensaun lalais, nune’e populasaun bele ezerse sira-nia direitu.

Hafoin rona preokupasaun hirak ne’e, Ministru Obra Públika, Salvador Eugênio Soares dos Reis Pires, hateten, polítika VIII Governu hakarak finaliza liña eletrisidade ba suku 76 ne’ebé seidauk asesu ne’ebé tinan kotuk anunsia pakote 34 no semana kotuk mós lansa tan ona pakote 44, ne’ebé projetu 78 ne’e kobre ona suku 55 hosi suku 76, restante  Eletrisidade de Timir-Leste, Empreza Públika (EDTL, E.P) halo hela levantamentu no tuir planu sei anunsia pakote datoluk iha marsu tinan ne’e hodi konklui suku ne’ebé seidauk asesu.

Munisípiu Covalima kobre iha área Mape, Irsai Usikai-Zumalai, ne’ebé daudaun  iha ona prosesu kontratasaun, inklui Fohorem-Laktos no Fohorem-Datorua, enkuantu seluk EDTL sei halo levantamentu.

“Governu halo ona projetu eletrifikasaun nasionál hamutuk 400-resin, ne’ebé konsege konklui 126 no 79 seluk la’o hela. Governu nia baze legál ba projetu eletrifikasaun nasionál mak dekretu-lei númeru 40, ne’ebé hateten fahe de’it, iha tinan 2016 revoga ona lei ne’e katak laiha ona ajudikasaun direta no iha VIII Governu nia polítika katak promosaun ba projetu hotu tenki tuir lei aprovizionamentu atu promove kualidade no mós oportunidade hanesan ba setór privadu hotu,” governante ne’e esklarese.

Liga ho estrada nasionál, Governu hakarak halo konesaun iha munisípiu sira hanesan trosu Maliana, Oileu, Fatululik, Fatumea, Tilomar, Wemasi ho distánsia kilómetru 92,2, ne’ebé daudaun ne’e iha faze diskusaun entre Ministériu Finansa no parseiru dezenvolvimentu sira, atu nune’e bele perkore ba fundu empréstimu.

“Entaun prepara uluk dezeñu atu aprezenta planu ne’ebé reál, nune’e bele hetan fundu halo konstrusaun estrada,” Ministru tenik.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here