Xefe Ekipa Institutu Jestaun Ekipamentu, Institutu Públiku, Rejiaun IV Maliana, Aguido Leto. Imajen Tatoli/Sérgio da Cruz.

BOBONARO, 11 janeiru 2022 (TATOLI) – Institutu Jestaun Ekipamentu, Institutu Públiku (IGE.I.P, sigla portugés) sei halo normalizasaun emerjénsia ba fatin haat iha munisípiu Bobonaro tanba hetan estragu hosi dezastre naturál iha tinan 2021.

Xefe Ekipa IGE Rejiaun IV Maliana, Aguido Leto, informa, fatin haat ne’ebé atu responde emerjénsia mak hanesan ponte ida iha postu administrativu Atabae, mota ne’ebé ameasa natar agrikultór iha postu administritivu Cailaco, ponte Bilimau no dalan ligasaun hosi suku Oe-Leu ba postu administrativu Lolotoe.

“Ami-nia planu ne’e bazea ba autoridade lokál sira-nia pedidu, fatin haat ne’e tama ona pakote emerjénsia, maibé ita hein orsamentu 2022 kuandu sistema loke  no osan aloka mai ita, hakarak ka lakohi tempu badak ita mobiliza ona ekipamentu ba terrenu hodi halo normalizasaun,” nia informa ba Agência Tatoli liuhosi telefónika, tersa ne’e.

Nia subliña, maske planu sira-ne’e seidauk implmeneta, maibé daudaun ne’e tékniku sira loke hela dalan alternativu provizóriu ligasaun hosi suku Oe-Leu ba postu administrativu Lolotoe nune’e komunidade sira asesu halo movimentasaun ba mai.

Purtantu intervensaun IGE halo durante loron hitu ne’e mós atu asegura viajen Primeiru Ministru Taur Matan ruak nian hosi munisípiu Covalima ne’ebé tuir ajenda sei halo diálogu ho komunidade Bobonaro iha loron 12 fulan-janeiru.

“Ami-nia tékniku sira halo ona peskiza ba fatin sira-ne’e, ita konsidera grave duni, maibé ninia estragu ne’e la’ós totál, iha de’it kilómetru rua hanesan ne’e, estrada ne’e kotu rohan-rohan más ida-ne’e ita presiza duni halo intervensaun lalais,” nia dehan.

“Ami sempre koopera ho tékniku Obra Públika nian maibé atu asegura estragu sira-ne’e dura tempu naruk, presiza Ministériu Obra Públika nia planu, sé lae tinan-tinan ita nafatin hasoru situasaun hanesan ne’e tanba fatin sira-ne’e risku ba dezastre naturál,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here