Ilustrasaun doasaun raan. Imajen hosi google

DILI,11 janeiru 2022 (TATOLI)—Xefe Unidade Banku Raan iha Hospitál Nasionál Guido Valadares (HNGV), Januario da Cruz Freitas, informa, daudaun estoke raan iha banku sangue sufisiente hodi oferese ba pasiente  ne’ebé hala’o tratamentu intensivu iha HNGV.

”Daudaun, ita iha estoke raan sufisiente hela hodi atende ba pasiente ne’ebé mak presiza raan. Tanba estoke raan hamutuk 109, kompostu hosi tipu raan A+ hamutuk 23, B+ 27, AB+ 10, O+ 46,’’ Xefe Unidade Banku Sangue, ne’e hateten ba Agência TATOLI, iha knaar fatin-Bidau, tersa ne’e.

Maibé, estoke raan menus liu mak ran AB no raan ho tipu O mak mamuk, ne’ebé pasiente ruma presiza raan ho tipu ne’e husu família voluntáriu halo doasaun raan.

Kona-ba tipu raan seluk ne’ebé estoke iha, médiku sira halo pedidu mai iha Banku Sangue atubele oferese no dala barak pasiente sira iha sala maternidade, internamentu, sirurjia no pediátria mak presiza raan.

“Ami-nia tarjetu ba estoke raan iha tinan ida ne’e hamutuk 5.280. Nune’e ita husu nafatin ba sidadaun sira atu ho voluntáriu halo doasaun raan atubele salva maluk seluk nia vida,” nia sujere.

Entertantu, hahú janeiru to’o dezembru 202, ema ne’ebé mak teste raan hamutuk 4.337, hosi númeru ne’e ema ne’ebé halo doasaun raan hamutuk 3.649.

Hosi númeru ne’e konsege prodús raan ho tipu A hamutuk 1.054, tipu B 1.847, AB 226 no O+ 1.522.

Hafoin halo teste raan, Banku Sangue deteta tipu moras hadaet haat, hanesan epatite B ka moras aten, epatite C, sífilis no HIV/SIDA.

“Hosi moras haat ne’e, ami haree katak moras epatite B mak númeru aas iha tinan 2021 ho ema na’in-161 no mós ho HIV/SIDA na’in-53,’’ nia informa.

Daudaun ne’e, pesoál saúde ne’ebé mak serbisu iha Departamentu Banku sangue na’in- 17.

Jornalista : Felicidade Ximenes

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here