Atu prevene moras dengue iha kapitál Dili, Ministeriu Saude orienta sira-nia funsionáriu tama sai bairru hodi rega susuk iha baleta no komunidade sira nia uma. Imajen TATOLI/António Gonçalves.

DILI, 11 janeiru 2022 (TATOLI)—Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Perreira Jerónimo, kontinua apela ba komunidade hotu atu hamoos ambiente uma-ninin hodi halo prevensaun ba moras dengue iha tempu udan tanba moras dengue daudaun ne’e sa’e makaas.

Notísia Relevante: PN husu Minsitériu Saúde tau atensaun ba moras dengue

“Ami hanoin presiza kooperasaun entre komunidade ho parte Governu liu-liu atu haree hamos uma ninin sira hanesan kalen sira ne’ebé iha, bee nalihun iha uma ninin, nune’e labele hein Governu mak taka hotu uma ninin sira-ne’e laloos. Tan ne’e, ita presiza koopera malu tanba moras ne’e mai hosi fatin sira-ne’e,” Ministru hateten iha plenária Parlamentu Nasionál, tersa ne’e.

Governante ne’e reprezenta Governu hodi ko’alia kona-ba asuntu ne’e tanba iha preokupasaun deputadu sira-nian ligadu ba kazu dengue ne’ebé daudaun ne’e rejista ho númeru boot no oinsá asaun Ministéiru Saúde nian ba moras ida-ne’e.

Ministéiru Saúde (MS) halo ona asaun hodi rega aimoruk ba fatin sira-ne’ebé deteta riksu boot ba dengue, no transfere ona pasiente balun iha Ospitál Nasionál Guido Valedares (HNGV) ba Vera Cruz no sentru saúde Formoza hodi fó atendimentu.

Dengue: Dili okupa númeru dahuluk

Tuir nota imprensa hosi ministériu saúde haktuir, daudaun ne’e iha munisípu Dili mak kontinua okupa númeru dahuluk ne’ebé rejista kazu dengue aas iha semana dahuluk, fulan-janeiru tinan 2022.

Hosi ne’e, sidaudaun ne’ebé afetadu ba moras ho variante dengue ne’e hanesan labarik ho tinan 1 ho 4,6%, labarik tinan 1 to’o 4 ho 44,8%, labarik tinan 5 to’o 14 ho 44,3%, tinan 15 to’o 24 ho 4%, idade 25 to’o 49 ho 1,1%, tinan 50 to’o 59 ho 0,0% no tinan 60 ba leten ho 1,1%.

Idade mais afetadu mak hosi idade menus hosi idade 14 mai kraik ho grupu idade 1 to’o 4 ho ho nia persentajem aas 44,8% no grupu idade 5 to’o 14 ho 44,3%.

Distribuisaun Kazu dengue bazeia posto administrativu iha tinan 2022 hanesan iha munisípiu Dili mak Dom Aleixo ho kazu dengue aas liuhosi postu administrativu hotu ho totál 56, Kristu Rei iha kazu 40, Nain-Feto iha kazu 30, Vera Cruz iha kazu 28, Metinaro iha kazu haat

Iha semana dahuluk, Servisu Saúde Munisípiu Dili rejista kazu dengue iha fasilidade saúde hamutuk 158, kompostu hosi Hospitál Nasionál Guido Vaaladares (HNGV) hamtuuk 32, klínika Fatumeta 17, Sentru Saúde Comoro 15, Vera Kruz 36, Formoza na’in-26, Becora 27, Sentru Saúde Metinaro na’in-haat, no klínika Bairru Píte na’in-ida.

Kazu dengue tuir klasifikasaun mak Dengue Fever (DF) ho totál kazu 146, Dengue Hemorrhagic Fever (DHF) ho totál kazu haat no Dengue Shack Syndrome (DSS) ho total kazu ualu (8).

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here