Prezidente Federasaun Atletizmu Timor – Leste, Afrânio Xavier Amaral. Imjen Tatoli/Dok

DILI, 11 janeiru 2022 (TATOLI)– Prezidente Federasaun Atletizmu Timor-Leste (FATL), Afránio Xavier Amaral, hateten, iha loron 20 to’o 22 janeiru ne’e, realiza kampionatu nasionál, hodi halo selesaun ba atleta timór-oan ne’ebé mak iha prestasaun di’ak bele ba partisipa Sea Games ne’ebé sei hala’o iha maiun tinan ne’e, iha Vietname.

Kompionatu Nasionál refere sei fó oportunidade ba Atleta hosi munisípiu 12 inklui Rejiaun Administrativu Espesiál Oé-Cusse no Ambeno (RAEOA) atu partisipa.

“Ita nia oráriu fiksu ona, ita sei realiza kampionatu nasionál ne’e iha Estádiu Munisipál Dili atu buka atleta ne’ebé di’ak hodi ba tuir Sea Games tinan ne’e,” Prezidente Afránio, informa ba Agência TATOLI iha knaar fatin-Jináziu Dili, tersa ne’e.

Atividade ne’e realiza tanba hetan apoiu orsamentu hosi Sekretária Estadu Juventude no Desportu (SEJD) ho montante $26.000-resin.

“Iha tinan 2021, ita labele realiza kampionatu nasonál tanba pandemia COVID-19, nune’e, ita foin mak realiza fali, ne’ebé iha ami nia proposta husu $30.000, maibé aprova de’it $26.000,” nia dehan.

Iha eventu ne’e, FATL sei hili atleta na’in-neen, kompostu hosi mane tolu no feto tolu atu lori Timor-Leste ba partisipa Sea Games iha Vietname.

Daudaun ne’e, FATL rejista ona atleta atletizmu hamutuk na’in-1000 resin iha territóriu nasionál.

Jornalista : Hortencio Sanchez

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here