Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

COVALIMA, 11 janeiru 2022 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, fahe informasaun ba autoridade no komunidade Covalima, kona-ba implementasaun programa ‘Bolsa Hakbiit’, ne’ebé objetivu prinsipál atu hadi’a kualidade ensinu superiór públiku no privadu.

MESSK oferese vaga Bolsa Hakbiit hamutuk 910, ne’ebé fahe ba parte rua, ensinu superiór públiku hanesan Universidade Nasionál Timor-Lorosa’e (UNTL) no Institutu Politékniku Betano (IPB) hamutuk 500 no ensinu superiór privadu sira hamutuk 410.

“Hosi númeru ne’e, Covalima-oan hamutuk 35, kompostu hosi feto 22 no mane 13, ne’ebé iha prosesu ida-ne’e kuandu kria Bolsa Hakbiit, ministériu fó prioridade ba ita-nia oan sira ne’ebé mai hosi inan-aman laiha kbiit finanseira no ita identifika área pontensiál hanesan agrikultura, enjeñaria, turizmu, saúde no seluk tan hodi hala’o estudu, atu nune’e bainhira ramata estudu bele hetan moris di’ak,” Ministru dehan durante diálogu komunitáriu iha resintu Aeroportu internasionál Komandante Ein Xefe, Kayrala Xanana Gusmão, Covalima, tersa ne’e.

Notísia relevante: Bolseiru Bolsa Hakbiit 480 asina termu kontratu eskola iha UNTL

Programa ne’e hahú rekruta kandidatu hosi munisípiu, nune’e bele promove igualdade ba oportunidade.

MESSK ninia kompeténsia iha área ensinu siénsia no teknolojia no kultura inklui liga ba edukasaun no formasaun, tanba polítika VIII Governu atu investe iha ema.

“Ema sai hanesan fatór importante ba dezenvolvimentu, tanba ne’e ministériu haree liu ba rekursu umanu, liuliu área edukasaun, ne’ebé Governu fó ona bolsa estudu liuhosi Fundu Dezenvolvimentu Kapitál Umanu hamutuk 6.401,” Ministru akresenta.

Durante ne’e, Covalima-oan hamutuk 308 mak benefisia ona bolsa estudu hosi Governu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here